Latest News

Serchhip-a thuthar thehdarhtu thenkhat ten IOC Veng-a PHE Booster Pump an tlawh

Serchhip IOC Veng-a PHE Booster Pump chawmtu Electric Transformer chhia thlakna tur Transformer thar chu nizan hmasa khan Serchhip rawn phurh thlen niin nimin khan bun nghal a ni a, nimin tlai khan dan pangngaia Tui pump chhunzawm nghal a ni.

PHE Department-in Serchhip khawpui, IOC Veng atanga chhim lama mipuite châwmtu tur Tui an pump chhâwnna, IOC Veng Booster Pump-a Electric motor châwmtu Transformer chhia thlakna tur hi Zuangtui-ah zuk lei niin nizan hmasa khan Aizawl atanga Serchhip rawn thlenpui a nih hnuah nimin atang khan transformer thar bun hna hi PHE Department chuan an thawk nghal a, nimin-a an hnathawk lai hi Serchhip-a thuthar lakhawmtu thenkhat te chuan tlawhin anmahni lo dawngsawngtu, Er. Samuel LR. Ralte, Sr. SDO, Serchhip Sub-Division chuan Transformer thar hmang tur chuan tih neuh neuh tur a awm nual tih sawiin, Transformer chu lirthei-a phurh a nih chuan hman lohin hun engemaw chen dah phawt a ngai tih a sawi a, hetianga hma an lak hnu nimin tlai dar 4:40 khan Tui hi pump chhunzawm leh theih a ni a, amaherawh chu ni 3 vel tui an sem tawhloh avangin a hmaa an Routine pangngai zawm leh thei tur chuan hun an la mamawh tam deuh tur thu a sawi a, tui an pump theih loh chhunga mipuiten dawh thei taka an lo hriatthiamnaah lawm thu an sawi bawk.

Helaia Tui pump-na khawl pakhat zawk Diesel Engine chu tun thla ni 6 khan a lo chhe tawh a, Diesel Engine khawl chhia hi a thlakna mai tur a awm lo tih pawh sawiin, Er. Samuel LR. Ralte chuan company-a order chuan thla 6-te nghah a ngaih thin avangin Kolkata-ah siamchawptir turin an Order mek tih a sawi a, mipui pung zelah Tui pump chhuah tam a ngaih tawh avangin an khâwl te chu a rim hle tih sawiin, ni khatah darkar 24-te tui pump a ngaih châng a awm a, an khawl chu chawl lova darkar 72 hna thawk thei a ni a, an hahchawlhtir zeuh zeuh tih loh chu Tui pump hna hi an thawk reng tih a sawi a. Mipuite tui mamawh dan chhutin nikhat-a darkar 24 tui an pump hian mipui mamawh zat pawh a phuhru zo lo lek lek tawh zawk tih a sawi bawk.

Thuthar lakawmtute zawhna chhangin Er. Samuel LR. Ralte chuan tun dinhmunah Serchhip tuilakna chu Phase-II a la tul rih lova a ngaih thu sawiin, Tuikum lui tui chu Serchhip mipuite châwmna khawp a la awm a, hei vang hian Tuikum Pump House leh Booster Pump-ah hian khawl dah belh a, Tuikum atanga Main Reserver thleng leh, Booster Pump atanga Vengchung-a an reservoir thleng pipeline hran ve ve kaltir leh theih a nih chuan kum engemawzat chu Serchhip mipui tan tui hnianghnar takin a la awm thei tih a sawi bawk.

Comments

Chhiar Hlawhte