Latest News

Hri kai mi 62 hmuh belh leh

Nimin khan Serchhip District-ah COVID-19 hri kai mi 62 zet hmuhchhuah belh leh an ni a, hri kai hmuhchhuah thar zinga a tam zawk te hi Serchhip khawpui chhung ami te niin Khaw-bel-ah mi 13 hmuh belh an ni a, Thenzawl-ah pawh hri kai pakhat hmuh a ni bawk.

PC. Laltlansanga’n thlantlin a nih chuan mirethei tan MLA Fund chawihniam a nih tur thu a sawi

Serchhip Bial Assembly bye-election neih tura Indian National Congresss (INC) Candidate, PC. Laltlansanga chuan MLA atana thlantlin a nih chuan mirethei leh harsa zawk te banphak turin MLA Fund chawihniam a nih tur thu a sawi.

Nimin-a Serchhip Press Club-a thuthar thehdarhtute a kawmna ah INC Candidate, PC. Laltlansanga chuan Serchhip Hmar Veng-a chhungkaw harsa taka seilian a nih thu sawiin, mirethei leh harsa zawk te dinhmun hrethiam phak a nih thu a sawi a. Serchhip Bial bye-election neih turah an Party hruaitute leh Pathian zara din theihna hun remchang a nei chu lawmawm a tih thu sawiin, Serchhip Bial-a din duh hian Party dang ah te pawh alo awm tawh thu a sawi a. Amaherawh chu a duhdan ang veka thil kal bik lovin tuna hun remchang a nei ta chu lawmawm a tih thu a sawi a, tun tum bye-election neih tur chu Serchhip Bial ni lo se a din loh tur thu a sawi bawk.

PC. Laltlansanga chuan Serchhip Bial Assembly bye-election a thlantlin te chu Minister an ni dawnlo tih a chiang nia sawiin, hei vang hian Bial mipuite pawhin Serchhip Bial hmangaihtu, Bial chhung vei bertu leh thothang tha an ngaihtuah tul a tih thu a sawi a. Nomination Paper-a address ziah chungchangah Serchhip mi ni lo anga mi thenkhat ten an sawi chungchangah Serchhip Hmar Veng-a Vote nei, In hmun LSC pawh nei a nih thu sawiin, “Serchhip mi ka nih leh nihloh hi Serchhip mipui ten an hre ber,” a ti.

INC Candidate chuan Serchhip Bialtu MLA atana thlantlin a nih chuan Serchhip Bial tan nasa taka hmalak a tum thu leh MLA Fund pawh tangkai taka hman a nih tur thu sawiin, mirethei leh harsa zawk te banphak tura chawihniam a nih tur thu a sawi a. Damlohna avanga hmunpui zawk pan te tan MLA Fund atangin Poor Fund an siam tur thu te, zirna sang zawk bei turte tan MLA Fund atangin Free Coaching buatsaih a nih tur thu te leh khualzin te hipna atan Mizo Typical Village, Mizoram hmundang a awm tawh te aia tha zawk siam a nih dawn thu leh Para-Gliding hmun te pawh chei that zel a nih dawn thu a sawi bawk. Hei bakah hian Zawlpui phai-ah pawh nasa taka hmalakna tur a awm thu pawh sawiin, Internal Road te pawh siam a nih dawn thu a sawi a. Serchhip Bial chu hun rei tak chhung Chief Minister Bial a lo nih tawh thu sawiin, Serchhip khua a hmasawnna tam tak chu Congress kutchhuak a nih thu leh Serchhip Bial-ah development a zuan-a a zuan thu a sawi bawk.

Nimin-a thuthar thehdarhtute a kawmna hunah hian PC. Laltlansanga hi Aizawl lam atanga rawn kal MPCC hruaitute leh Serchhip Block Congress Committee hruaitu thenkhat ten an tawiawm a ni.

Comments

Chhiar Hlawhte