Latest News

Mizoram-ah COVID-19 hri kai 36 hmuh leh a ni

Niminpiah khan Mizoram-ah Sample 1660 enfiah niin COVID-19 hri kai mi 36 zet hmuhchhuah leh an ni a, hri kai hmuhchhuah zingah hian hri kaina hriatloh an awm nual bawk.

Niminpiah khan ZMC Laboratory-ah Sample 141 enfiah niin heng atang hian hri kai mi 5 hmuh an ni a, an zinga pahnih hi hri kai kawmhnaih avanga inkhunghrang niin midang te hi tunhnaia State pawn atanga rawn haw, Lengpui Airport Screening Point-a Rapid Antigen Test hmanga enfiah-a hri kailo, a hnua enfiah leh atanga hri kai hmuhchhuah an ni a, District hrang hranga TrueNat Laboratory atanga Sample enfiah 73-ah hri kai hmuh an awmlo thung.

Niminpiah khan Rapid Antigen Test hmangin Sample 1446 enfiah niin hri kai 31 zet hmuhchhuah leh an ni a, heng zinga mi 11 te chu State pawn atanga Mizoram-a rawn lut tur, Lengpui Airport Screening Point-a lo enfiah atanga hri kai an ni. Aizawl khawpui chhung Veng hrang hrang atangin hri kai mi 16 zet hmuhchhuah an ni a, an zinga mi 10 te chu hri an kaina hriatloh an ni. Champhai District-ah hri kai pakhat hmuh ni bawkin hri a kaina hriat a ni lova, Lawngtlai District-ah RKRTP Construction Company hnuaia thawk hri kai pathum hmuh an ni bawk.

Nimin khan Mizoram-ah COVID-19 hri kai mi pakhat chu enkawl dam ni ve lehin, heti hian nimin tlai dar 5:00 thlenga Mizoram-a hri kai hmuhchhuah chu 4655 niin hri kai hmuhchhuah zinga 4469 te chu enkawl dam an ni tawh a, hei hi hri kai hmuhchhuah atangin zaa 96.00 niin tunah hian hri kai enkawllai 174 an la awm mek a, nunna chan mi 12 an awm tawh bawk a ni.

Comments

Chhiar Hlawhte