YMA in ruihhlo do beihpui thlak leh dawn

Central YMA President, Vanlalruata chuan Central YMA in ruihhlo do beihpui a thlak leh dawn tih sawiin, sawrkar pawh beihpui thlak turin an beisei a sang hle tih an sawi.

Nimin zing a Central YMA Office tual-a Central YMA in ruihhlo an man sa halralna hun an buatsaih ah he thu hi sawiin Central YMA President chuan tunhnaiah Mizo thalaite'n ruihhlo an thihpui nasat tak avangin Central YMA CEC thukhawm chuan hmalak nasat zual a tul tih an rel thu a sawi a. He an thurel bawhzuina atan leh tunah hian tan lak thar a ngai ta hle tih an hriat avangin loh theihloh in ruihhlo dona kawngah ke pen nasat lehzual a tul ta tih a sawi bawk.

Central YMA President chuan nikum chhung ringawt khan Mizoram-ah ruihhlo avanga thi thalai mi 67 an awm thu sawiin, an chhinchhiah danin kum 16 chhunga ruihhlo avanga thi tam ber kum a ni ta hial mai chu lungchhiatthlak a tih thu a sawi a. Sawrkar pawhin nasa lehzuala hma a lak a tul hle dawn nia an hriatthu sawiin, Sawrkar, Kohhran leh YMA te'n theihtawp chhuaha ruihhlo an do chungin sawrkar chu kutke ber a ni lo thei lo tih a sawi.

He hunah hian Central YMA General Secretary, Prof. Lalnuntluanga pawhin ruihhlo do beihpui thlak leh turah hian CEC Member te insem rualin Vigilance Sub-Committee te hmang tangkaiin tunah hian hmalak dan tur an duan thu a sawi a. Central YMA chhinchhiah danin, kumin (2021) kal mekah hian ruihhlo avangin thalai mi 15 an thi tawh a ni.

Nimin zinga ruihhlo chi hrang hrang Central YMA in an man an tihral tak hi tualchhung Bazar-ah chuan cheng nuai 22 chuang man a ni.