World Malaria Day pualin Mizoram-ah hun hman a ni

Niminpiah April 25, 2021 khan khawvel pumah ‘World Malaria Day’ hman niin he Ni hi Pathianni a nih avangin Mizoram-ah chuan nimin khan a remchan anga hun hman a ni.

Kumin a ‘World Malaria Day’ ah hian thupui atan ‘Reaching the Zero Malaria Target’ tih chu hman niin Mizoram-ah hri leng avanga inpunkhawm a remchan loh avangin mipui pungkhawm lo zawngin Malaria chungchanga hriat tur pawimawh hrang hrang inzirtirna neih a ni a, Serchhip-ah chuan Bazar-ah mipui hmuh theih tura thuziak tar a nih bakah Serchhip Indoor Stadium-a COVID-19 Vaccine la te hnenah Malaria natna chung-changa hriat tur pawimawh hrang hrang inziahna an sem nghal bawk a ni.

Nikum (2020) chhung khan Serchhip District-ah hian mi 30,342 te thisen enfiah niin heng atang hian Malaria hri kai mi 18 hmuh-chhuah an ni a, heng Malaria hrik pai zinga mi 10 te hi PF niin midang 8 te chu PV an ni thung a, heng Malaria hrik pai hmuhchhuah te hi an vaia enkawl dam vek niin Malaria vanga nunna chan an awmlo a ni. Nikum hmasa (2019) khan Serchhip District-ah Malaria hrik pai mi 23 hmuhchhuah awmin nunna chan an awmlo bawk a ni.

NVBDCP thawktute chhinchhiah danin, Mizoram-ah Malaria vei hmuhchhuah hi kumtin mi sang tel awm reng mah se, thihpui erawh an tlem tial tial a, kum 2006-ah thihpui mi 121 an awm laiin, kum kalta 2020-ah chuan Sikserh thihpui mi paruk-ah a tlahniam tawh a. Kum kalta 2006-2020 thleng khan thisen endik 34,01,603 awm tawhin, hemi atanga Sikserh vei hmuhchhuah chu 1,59,751 niin, Malaria vei hmuhchhuah zawng zawng zinga 80% velte chu PF an ni.

Kum 2006 atanga nikum thleng khan Mizoram-ah Sikserh (Malaria) vanga thi mi 595 zet an awm tawh thung a ni.