Latest News

COVID-19 hri leng mekah India ram dinhmun a chhe leh sawt hle - Health Minister

Health Minister Dr. R. Lalthangliana chuan COVID-19 hri leng mekah India ram dinhmun a chhe leh sawt hle tih sawiin, hri kai hmuhchhuah pawh nasa taka an pun leh tawh thu a sawi.

India rama COVID-19 Second Wave hluar mek chungchanga Inrinni-a mipuite hnena thuchah a tihchhuah ah Health Minister, Dr. R. Lalthangliana chuan COVID-19 hri leng ah hian India ram chu nikum kumtawp lam atang khan kan dinhmun a ziawm viau nia sawiin, amaherawhchu March thla tir lam atang khan rin phak bakin hri kai thar kan pung ta tih a sawi a, “Tunhnaiah phei chuan kan dinhmun a chhe sawt hle a ni, nimin kha thla 6 chhunga nikhat thil thua hri kai thar tam ber tum niin mi 81,466 lai hri kai thar an awm a, mitthi pawh nitin mi 450 chuang an ni chho leh ta,” a ti a. “He Second Wave rawn thlentirtu COVID-19 variant thar, E484Q leh L452R te hi mithiamte chuan a hmaa COVID-19 hrileng ai khan 70% in inkaichhawn a awlsam zawk niin an hria a; chu mai bakah he hri hi thalaiten an kai nasa zawk hle niin hriat a ni bawk. India ram State tam zawk chu he hri vang hian an buai leh hle tawh mai,” tiin India ram State hrang hrangah inkhuahkhirhna kalpui leh a nih tawh thu a sawi bawk.

Health Minister chuan he hri thar hian Mizoram a la rawn thleng rih lo niin lang mahse tunhnaiah hri kai hmuhchhuah sample 200 lai phailam Laboratory lian-ah endik tura thawn leh mek a nih avangin kan dinhmun diktak hriat theih ala nih loh thu a sawi a, “Chutih rualin nitin deuhthaw phai lam atanga lo haw COVID-19 positive hmuhchhuah thar kan nei leh tawh a, eng chiah hi nge kan dinhmun a hriat theih tak tak rih loh a, kan mithiamte thla a muang thei rih lo a ni,” tiin he hri thar ziarang diktak hi mithiamte pawhin an la hriat kim theih loh avangin Mizoram chhunga chengte pawh a hma aia kan fimkhur lehzual a ngai hle tih a sawi a. “Lo thleng lo tura theihtawp chhuah a tul rualin he Second Wave hi hmachhawn tura kan theih ang chinah kan lo inbuatsaih a ngai tih hi kan mithiamte ngaihdan a ni,” a ti.

Dr. R. Lalthangliana chuan COVID-19 vanga inkharkhip leh inkhuahkhirh khauh taka kan kalpui chhunga kan tawrhna leh hrehawmna te hre rengin khatiang kha kan tawn lohna turin kan theihna zawn theuh a tan la turin mipuite chu a chah a. a tul tawp a nih loh chuan Mizoram Mizoram pawn-a zinchhuak rihlo tura chahin, loh theih lohva zinchhuakte pawh fimkhur taka khawsa tur leh an lo kir dawna COVID-19 negative test result an nei a nih pawhin, sample test hnuah hri kai leh theih a nih avanga fimkhur turin a chah a. Chhiatni thatni-ah pawh SOP ngai pawimawh turin a chah bawk. Hei bakah hian Health Minister chuan hri leng dona kawnga thawktu zawng zawngte chungah lawmthu sawiin, COVID-19 dona kawnga sulsutu zawng zawng, a te ber atanga a lian ber thlenga tawngtai sak turin mipuite a chah bawk a ni.

Comments

Chhiar Hlawhte