Hri kai hmuh belh zel; Mi 2 ZMC-ah reffer an ni

Niminpiah leh nimin a Serchhip District-a Sample enfiah atangin COVID-19 hri kai mi 3 hmuh leh niin Serchhip District-a hri kai mi pahnih te chu ZMC lama enkawl tura thawn an ni thung.

Niminpiah khan Serchhip-a TrueNat Laboratory-ah Sample 5 enfiah niin hri kai hmuh-chhuah an awm lova, Rapid Antigen Test hmangin Sample 23 enfiah niin heng atang hian COVID-19 hri kai mi pakhat hmuhchhuah a ni a, he hri kai hmuhchhuah hi Sainik School, Chhingchhip-a zirlai naupang kum 7 mi niin tunhnaia hri kai hmuh-chhuah tawh nen inkawmhnaih atanga hri kai nia hriat a ni a, hri kai lanchhuahna nei a ni.

Nimin khan Rapid Antigen Test hmangin Sample 79 enfiah leh niin hri kai hmuhchhuah an awm lova, TrueNat Laboratory-ah Sample 4 enfiah niin hri kai pahnih hmuh belh leh an ni a, pakhat hi State pawn atanga rawn haw niin hri kai lanchhuahna nei ve ve an ni.

Nimin thleng khan Serchhip District-ah COVID-19 hri kai hmuhchhuah chu 197 an ni ta a, an zinga 180 te chu enkawl dam an ni tawh a, Serchhip District-a hri kai enkawllai mi 2 te chu nimin khan ZMC lama enkawl tura reffer niin heti hian nimin tlai thleng khan Serchhip-a Covid Care Centre-a hri kai enkawllai chu mi 13 an ni a, In lama inenkawl mi pakhat awmin hri kai zingah nunna chan mi pakhat a awm tawh a ni.