Mizoram-ah hri kai 73 hmuh belh; Dam thar 24 awm

Niminpiah khan Mizoram-ah Sample 2259   enfiah niin COVID-19 hri kai mi 73 hmuhchhuah leh an ni a, a hma ni aiin hri kai hmuh hi an tlem hret a ni.

Niminpiah khan ZMC Laboratory-ah Sample 460 enfiah niin hri kai 12 hmuhchhuah an ni a, State pawn atanga rawn haw leh hri kai nen inkawmhnaih avanga In lama inkhunghrang an ni tlangpui a, an zinga pakhat hi taksa-a hri kai lanchhuahna neih avanga Sample enfiah a ni thung. Niminpiah khan District hrang hranga TrueNat Laboratory-ah Sample 29 enfiah niin hri kai 5 hmuhchhuah an ni bawk a, Serchhip District-ah hri kai pahnih hmuh niin Lunglei leh Siaha-ah State pawn atanga rawn haw zingah hri kai pakhat ve ve hmuh an ni a, Champhai-ah hri kaina hriatloh hri kai pakhat hmuh a ni bawk.

Rapid Antigen Test hmangin niminpiah khan Mizoram-ah Sample 1770 enfiah niin hri kai 56 hmuhchhuah an ni bawk a, Lengpui Airport Screening Point-ah State pawn atanga rawn lut tur enfiah atangin hri kai mi 4 hmuh an ni a, Aizawl khawpui chhungah hri kai 36 hmuh niin an zinga 23 te chu hri kaina hriatloh an ni a, midang 10 te hi hri kai nen lo inkawmhnaih atanga hri kaichhawng niin midang pathum te hi tunhnaia State pawn atanga rawn lut an ni thung a ni. Heng bakah hian Lunglei leh Champhai District-ah hri kai pahnih ve ve hmuh niin Lawngtlai District-ah hri kai 4 hmuh an ni a, Kolasib District-ah hri kai 6 hmuh an nih bakah Saitual District-ah hri kai pahnih hmuh an ni bawk.

Nimin khan Mizoram-ah COVID-19 hri kai enkawllai mi 24 te chu hri lakah fihlimin anmahni enkawlna hmun atanga chhuahtir leh an ni a, Mizoram-a hri kai hmuhchhuah tawh chu 5158 niin heng zinga mi 4600 te chu enkawl dam an ni tawh a, hei hi hri kai hmuhchhuah atanga chhutin za zela 89.20 niin tunah hian hri kai enkawllai 546 an la awm mek a, hri kai enkawllai hi Aizawl District-ah tam berin 413 an awm a ni.

Darkar 24 chhungin hri kai thar nuai 3 aiin tam :

Nimin zing dar 8:00 atanga chhiarlet-a darkar 24 kalta chhung khan India ramah COVID-19 hri kai 3,14,835 hmuhchhuah niin ni khat a hri kai hmuhchhuah tam ber ni leh darkar 24 chhunga hri kai hmuh in nuai thum a tlin hmasak ber a ni. Ministry of Health & Family Welfare in a chhinchhiah danin hemi chhung hian India ramah Sample 16,51,711 enfiah niin heng atang hian hri kai 3,14,835 hmuh an ni a, heng te nen hian India ramah Sample 27,27,05,103 enfiah ni tawhin hri kai hmuh tawh zawng zawng chu 1,59,30,965 an tling tawh a ni. India rama hri kai hmuhchhuah atang hian 1,34,54,880 te chu enkawl dam ni tawhin hei hi hri kai hmuhchhuah atangin zaa 85.10 a ni a, tunah hian hri kai enkawllai 22,91,428 la awmin nunna chan mi 1,84,657 an awm tawh bawk a ni.