Serchhip District-ah Vawk 13 a thi tawh; Hmalak zel dan tur sawihona neih a ni

Mizoram hmun thenkhat-a Vawk natna hri a len mek laiin Serchhip District-a Vawk thi pawh 13 an tling tawh a, District Level Co-Ordination Committee on African Swine Fever and Other Transboundary Animal Diseases chu nimin khan thukhawmin Vawk hri leng chungchanga hmalak dan tur hrang hrang an sawiho bawk.

District Level Co-Ordination Committee on African Swine Fever and Other Transboundary Animal Diseases thutkhawm Serchhip DC Meeting Hall-a neih hi Addl. DC, Lalmuansanga Ralte chuan kaihruaiin tunhnaia  Lungsen khua leh a chhehvela Vawk thi chu an Sample enfiah niin a result hi hriat la ni lo mah se African Swine Fever (ASF) ni ngei tura rinna a sang hle tih a sawi a, hei vang hian Serchhip District mipuite pawh he hri leng laka kan ran te an him theihna tura kan tantlan a tul thu sawiin, hemi kawnga hmalakna ah luhlul fal awmlo se a duh thu a sawi bawk.

He hunah hian Serchhip DVO, Dr. R. Lalmakthanga chuan tunhnaia Mizoram-a Vawk natna hri leng mek chungchang a sawizau a, Serchhip District-ah pawh tunhnaia Vawk thi chu 13 a nih tawh thu sawiin, heng te hi an taksa te enfiah niin an Sample pawh enfiah turin Aizawl-a Epidemiological Centre-ah thawn a nih tawh thu a sawi bawk.

He Meeting hian Vawk natna hri leng mek laka mipuite an him theihna tura hmalak dan tur hrang hrang relin, Vawk thi a awm belh zel lohna turin mipui inzirtirna tam zawk neih nise an ti a, Vawk leh Vawksa atanga thil siam lakluh khapna awm mek chu khauh taka kalpui relin he hmalakna atan hian AH&Vety Department te, Police te, BSF te, NGO leh VC te nena thawhhona tha zawk neih nise an ti. District chhunga Vawk leh a sa zawrh leh hralh chungchangah VC leh YMA te hriatpuina lehkha leh a bialtu Vety lama thawktuten Vawk hrisel a ni tih lehkha a pek te chauh zawrh chhuah phal ni se an ti a. Heng fim-khurna dan tlin zo lo leh phal lohva lakluh hriat leh man a awm chuan National Advisory Norms anga a rang thei ang bera nuai bo zel nise an ti bawk.

Hei bakah hian Dan bawhchhia Serchhip District-a a Vawk lakluh man an awm chuan Mualvawm-a Sa talhna In-ah dah thin nise an ti a, Vawk man te reng reng chaw pek chu a phurtu leh laluttu te mawhphurhna a nih thu pawh he hunah hian tarlan a ni bawk.