Latest News

Inthlan hun tih danglam tumna ala awm lo

 Inthlang tur hian kan inpeih tawh - Returning Officer

Thla thar April 17-a Serchhip bial Assembly bye-election neih tura ruahman chu Mizoram Political Party hrang hrangte'n Vote thlak ni leh Vote chhiar ni sawn turin Election Commission-ah ngenna thlen mah se tun thlengin sawn tumna a awm hriat ala ni lova. April 17-a inthlanna nei turin ruahmanna engkim kalpui a ni.

Nimin khan thuthar thehdarhtu thenkhat te chuan Serchhip bial-a Assembly bye-election neih tura Returning Officer, Kumar Abhishek chu a Pisa-ah kawmin he thu hi a sawi a, District Bawrhsap ni bawk Kumar Abhishek chuan Mizoram-a Political Party hrang hrangte'n Serchhip bial-a Assembly Bye-Election lo awm turah vote thlak ni leh vote chhiar ni sawn tura ngenna an thehluh chu Election Commission of India (ECI) leh Chief Electoral Officer (CEO) Mizoram atangin thudawn an la neih loh thu a sawi a, “Thudawn kan la neih loh avangin keini chuan ECI-in inthlan hun leh vote chhiar hun a lo bituk tawh zawm turin hma kan la a ni,” a ti a, April 17-a inthlang turin ruahmanna engkim an kalpui thu a sawi a, “Inthlang tur hian kan inpeih tawh e,” a ti.

Serchhip bial-ah hian vote nei te tana Vote thlakna tur Polling Station 29 awmin heng zingah hian Polling Station venhim uluk zual ngai bik, Sensitive Polling Station leh Critical Polling Station a awm loh thu sawiin Kumar Abhishek chuan a sawi a, “Inthlan thianghlim leh felfai tak kan neih theih ngei kan beisei a, chumi tur chuan hma kan la a ni,” a ti a, inthlanna thianghlim leh felfai a awm theihna atan hian Mizoram People Forum-te nen pawh Meeting neih an la tum thu a sawi a. COVID-19 avangin tun tum inthlan turah hian thil thar han buatsaih an neih loh thu pawh sawiin, “Chutihrualin COVID-19 avanga inkaihkhirhna dan hrang hrang siamte tha taka zawm a nih theihna atan hma kan la dawn a ni. Inkaihhruaina dan zawmlo te chungah chuan dan angin action lak a ni ang,” a ti bawk.

Election Model Code of Conduct chung-changah complaint neuh neuh chu an dawn thu sawiin Returning Officer chuan, “Complaint lian tham erawh kan la dawng lo. Complaint kan dawn chu kan bawhzui nghal zel. Keini chuan Election Model Code of Conduct hi khauh taka ken-kawh kan tum,” a ti bawk.

He inkawmna ah hian General Observer, Lokesh Kumar leh Serchhip Addl. DC, Lalmuansanga Ralte te pawh an tel bawk a ni.

Comments

Chhiar Hlawhte