Ni khat-ah COVID-19 hri kai 14 hmuhchhuah an ni

Niminpiah khan Mizoram-ah COVID-19 hri kai mi 14 zet hmuh belh leh an ni a, a tam zawk erawh State pawn atanga Mizoram-a rawn lut tur an ni.

Niminpiah-a Mizoram-a COVID-19 hri kai hmuhchhuah te hi Rapid Antigen Test hmanga Sample enfiah 1337 te atanga hmuh vek an ni a, Lengpui Airport Screening Point atangin hri kai mi 10 zet hmuh niin an zingah hian TBZ Missionary chhungkua mi 4 an tel a, midang 6 te hi lehkha zir rawn haw leh Mizoram-a hna thawk tura rawn haw te niin taksa-a hri kai lanchhuahna neilo te an ni hlawm.

Niminpiah-a hri kai hmuhchhuah dang 3 te hi Aizawl khawpui chhunga hri kai hmuhchhuah te an ni thung a, an zinga pakhat hi tunhnaia Assam-a Vote thlak tura haw, taksa-a hri kai lanchhuahna nei niin hri kai nen inkawmhnai pakhat chu hri a kai tih hmuhchhuah a nih bakah hri kaina hriatloh pakhat hmuhchhuah a ni bawk a. Kanhmun Screening Point-ah Tripura atanga rawn lut tur mi pakhat chu hri a kai tih hmuh-chhuah a ni bawk.

Niminpiah khan ZMC Laboratory-ah Sample 35 enfiah niin hri kai hmuhchhuah an awmlo a, District hrang hranga TrueNat Laboratory-ah Sample 2 enfiah awmin hri kai hmuhchhuah an awmlo bawk a, niminpiah-a Mizoram pum-a Sample enfiah 1374 atangin hri kai mi 14 te hi hmuhchhuah an ni. Niminpiah vek khan Zemabawk-ah Rapid Antigen Test hmangin hri kai mi 4 hmuh an awm nia puanzar a ni bawk a, hei hi nimin khan ZMC Laboratory-ah an Sample ennawn leh niin an result erawh hriat hman a ni ta rihlo thung.

Nimin khan Mizoram-a hri kai enkawl mi pathum te chu hri lakah fihlimin anmahni enkawlna hmun atanga chhuahtir an ni a, heti hian nimin tlai dar 5:00 thlenga Mizoram-a hri kai hmuhchhuah chu 4522 an tling ta a, hri kai hmuhchhuah zinga 4454 te chu enkawl dam ni tawhin hei hi hri kai hmuhchhuah atanga za zela 98.49 a ni a, tunah hian hri kai enkawllai 57 la awmin nunna chan mi 11 an awm tawh bawk a ni.

India-ah hri kai hmuhchhuah an pung zel

Niminpiah khan India ramah COVID-19 hri kai 1,26,789 zet hmuh leh niin India ramah nikhat-a hri kai hmuhchhuah tam ber ni a ni. Niminpiah khan India ramah Sample 12,37,781 enfiah niin heng atang hian COVID-19 hri kai 1,26,789 hi hmuhchhuah an ni a, a hma ni hian hri kai 1,15,736 hmuhchhuah ni bawkin hei hi a rawn khum leh a ni. Tun thlengin India ramah hri kai hmuhchhuah chu 1,29,28,574 tling tawhin an zinga 1,18,51,393 (91.67%) te chu enkawl dam an ni tawh a, tunah hian hri kai enkawllai 9,10,319 (7.04%) la awmin nunna chan 1,66,862 (1.29%) an awm tawh bawk a ni.