DoNER Ministry Parliamentary Consultative Committee-ah Mizoram mamawh hrang hrang thlen

DoNER Ministry Parliamentary Consultative Committee thutkhawm chu nimin khan New Delhi-ah neih a ni a, he hunah hian Mizoram Lok Sabha MP, C. Lalrosanga chuan Mizoram mamawh hrang hrangte thlenin, hmarchhak bial tana Ministry hrang hrang sum ruahman hman tangkai a tul thu a sawi bawk.

Video Conferencing hmanga DoNER Ministry Parliamentary Consultative Committee thutkhawm hi DoNER Minister, Jitendra Singh chuan kaihruaii Central Sawrkar Ministry hrang hrang aiawhte an tel a, he hunah hian Mizoram Lok Sabha MP, C. Lalrosanga chuan Mizoram-a hmun hnufual bik te tana ruahmanna hran 'Special Package' siam turin DoNER Ministry chu a ngen a. Bangladesh leh Myanmar ramri hrula inbiakpawhna leh inkalpawhna kawng tha zawk te siam a tul thu pawh sawiin, Aizawl thleng chauh nilo, Mizoram chhim tawp thlenga Rel kawng siam a rawt bakah ramri hrul hmuna inbiakpawhna thalo te siamthat vat vat tul a tih thu Consultative Committee chu a hrilh bawk a ni.

Mizoram Lok Sabha chuan Mizoram-in Thlawhna tumhmun a mamawh thu pawh sawiin, tuna Airport awmchhunah Thlawhna service tam zawk siam a tul thu a sawi a. He thutkhawmnaa tel ve Civil Aviation Ministry thuneitute chuan Lengpui Airport-ah hian Thlawhna service tam zawk siam tum mek a nih thu an sawi a. India ramdang nena lehkha leh bungraw inthawn tawnna Postal Service a that tawk loh thu pawh C. Lalrosanga chuan sawiin, Dak-a lehkha-thawn a thleng har thin hle a ni tih a sawi a, hemi tireh turin Dak lam hotute a ngen nghal bawk.

He hunah hian MP, C. Lalrosanga chuan North Eastern Council (NEC) thuamthat leh thuneihna sang zawk pek tul a tih thu pawh sawiin, Hmarchhak bial hmasawnna chak zawk thlen nan NEC chu tun aia phuisui zawka thuamthat a tul a ni, a ti a. Hmarchhak bial tana Ministry hrang hrang sum ruahman hman tangkai a tul thu sawiin, Ministry hrang hrangin hmarchhak State te tana sum an ruahman za zela 10, Gross Budgetary Support chu anihna ang taka hman a tul thu DoNER Ministry Consultative Committee thutkhawmna-ah hian a sawi bawk a ni.