Latest News

Chanchin thar thenkhat :

Ni 4 chhung awh tur nei tan

Regional Consultation of North Eastern Region Sustainable Development Goals (SDGs) Index & Dashboard chu a vawikhatna atan nimin khan State Convention Centre, Shillong-ah neih tan a ni a, he Regional Consultation hi ni 4 chhung awh tur niin, Workshop ah hian Sustainable Development Goals (SDGs) ti hlawhtling tura North East States hrang hrang te hmalakna leh thlenchin tehna tur tehfung (Indicators) zirchian a ni ang. Kum 2018 atang khan NITI Aayog in kumtin India ram State hrang hrang te leh Union Territory te SDGs tih hlawhtlinna kawnga kan thlenchin leh dinhmun tlangpui tarlangin ranking a tichhuak a, kum 2018 khan India ramah Mizo-ram chuan dinhmun 6-na hauhin Indicator then-khat ennawn (revised) anih avangin kum 2019 ranking ah erawh Mizoram dinhmun a tlahniam hret a, India ram pumpui ah 12-na a ni.


NESO in an dem thu sawi

India hmarchhak-a Zirlai pawl hrang hrang inzawmkhawmna, North East Students Orga-nisation (NESO) chuan tunlai-a thil thleng, Myan-mar buaina chuangchangah Video Conferencing kaltlangin Meeting an nei a, NESO chuan Myanmar sipai ten mipui thlan sawrkar diklo taka a paih-thla leh a hnu lama thisen chhuahna rapthlak tak a thlen tir chu rapthlak an tih thu sawiin, Sipai ten an mi leh sa te rawng taka a nghaisakna hian Democracy leh Human Rights an rap bet ni ah an ngaih thu a sawi a, thenawm ram-a mipui thlabara an tlanchhiat chhanah hian Burma sipaite chu mawhphurtu ah ngaiin, rawng taka mipuite chunga an chetna chu na taka an dem thu an sawi bawk a ni.


SEDP tanpuina sem leh

Socio-Economic Development Policy (SE-DP) kaltlangin nimin khan Champhai District-a Broiler Ar vulhtu mi 18 te hnenah tanpuina thawh-hnihna hlan an ni a, Ar note 200 theuh bakah a chaw man tur Rs. 29,800/- theuh he hunah hian pek an ni.


ZPM dilna ECI in remti lo

Serchhip Bial-a Assembly bye-election neih tura Vote thlak ni, April 17 chu Kohhran ni serh a nih avang leh Vote chhiar ni, May 2 chu Kohhran tam ber te ni serh a nih avanga ZPM in Election Commission of India hnena inthlan hun ti danglam tura ngenna an thlen chu ECI chuan rawn chhangin hemi chungchang hi uluk taka zirchian a nih hnuah tih danglam theih a nih loh thu a rawn hriattir.


Hnahthial DLTF thukhawm

Nimin khan Hnahthial-ah District Level Task Force on Covid-19 chu thukhawmin he hun kaihruaitu District Bawrhsap, H. Dolian-buaia chuan hripui leng mekah mipuite chu an fimkhur a tul thu a sawi a, khawtin te pawh mahni khaw tih dan leh kalphung ringawt dah lian lovin Sawrkar thuchhuakte ngai pawimawh a, ruahmanna te tha taka zawm turin a chah bawk.


A mawhphurtu chhui mek

AH&Vety Minister, Dr. K. Beichhua chuan Mizoram-a Vawk pul hri leng mek chu state pawn atanga kenluh ngei nia an hriat avangin a mawh-phurtute an chhui mek tih nimin-a a Pisa-a thut-khawm ah a sawi a, he Vawk hri leng hi African Swine Fever (ASF) ngei nia an hriat tawh avangin Vawk kah rai, Artificial Insemination (AI) an kalpui mek pawh an tihtawp nghal thu an sawi bawk.

Comments

Chhiar Hlawhte