Hri kai hmuh thar awm belh

Niminpiah-a Serchhip District-a Sample enfiah atangin COVID-19 hri kai mi 10 hmuh belh niin an vai hian tunhnaia State pawn atanga rawn lut an ni.

Niminpiah khan Serchhip District-a TrueNat Laboratory-ah Sample 15 enfiah niin COVID-19 hri kai hmuhchhuah an awm lova, Rapid Antigen Test hmangin Sample 46 enfiah ni bawkin heng atang hian hri kai mi 10 hmuhchhuah an ni a, heng hri kai hmuhchhuah te hi mipa hlir niin Kram Infracon Pvt. Ltd. hnuaia hnathawk tura Assam, Bihar, Tripura leh Nepal atanga April ni 22, 2021 a lo thleng niin anmahni Camp, Chhingchhip-a khunghran lai mekte an ni a, taksa-a hri kai lanchhuahna neilo an ni.

Nimin khan Serchhip District-a True-Nat Laboratory-ah Sample 10 enfiah niin Rapid Antigen Test hmangin Sample 25 enfiah a ni bawk a, heng atang hian hri kai mi pathum hmuhchhuah belh leh niin Chhingchhip khua atanga Sample lak leh enfiah te an ni.

Hetihlai hian nimin khan Serchhip District-a COVID-19 hri kai mi pali te chu hri lakah fihlimin Nursing School CCC atanga chhuahtir an ni ve leh thung a, heng mite hi tun thla ni 19-a hri kai hmuhchhuah te an ni.

Heti hian nimin thleng khan Serchhip District-a COVID-19 hri kai hmuhchhuah chu mi 277 an tling ta a, an zinga mi 193 te chu enkawl dam ni tawhin tunah hian hri kai enkawllai 83 an awm mek a, an zinga mi 81 te chu Nursing School CCC-ah enkawl niin midang pahnih hi Home Isolation-a enkawl an ni thung a, hri kai hmuhchhuah zingah nunna chan mi pakhat a awm tawh bawk.