Latest News

COVID-19 hri danna la thei chin zawng ten hri danna la vek turin Serchhip CMO in a sawm

Image
Serchhip District Chief Medical Officer Dr. Laldawngliana Sailo chuan COVID-19 chu theihtawp chhuaha kan do chung pawha kan do hnehloh a ni tih sawiin, chumi dona hmanraw pawimawh tak chu hri danna laka ni tih a sawi a, hri danna la thei chin te chu la vek turin a sawm bawk.

Health Minister hovin Mizoram-a hri kai hmuhchhuah dan chungchang thlirho a ni

COVID-19 hri leng avanga inkhuahkhirhna kalpui mek chungchang chu nimin khan Health Minister, Dr. R. Lalthangliana hovin sawrkar mi pawimawh ten an thlirho.

He thlirhona SAD Conference Hall-a neih ah hian IDSP hotute hnen atangin tunhnaia Mizoram-a COVID-19 hri kai pun dan report ngaihthlak niin March ni 29, 2021 atanga April ni 25, 2021 inkarah hri kai 948 hmuhchhuah niin Lengpui Airport-a lo thleng zingah hri kai 273 hmuhchhuah a ni a, an zinga 193 hi Lengpui Airport an rawn thlen hlima Lengpui Airport Screening Point-a RAgT hmanga hmuhchhuah niin, midang 80 hi Lengpui Airport Screening Point-a RAgT negative, a hnua hri kai tih hmuhchhuah leh an ni. Vairengte kaltlanga rawn lut zingah hri kai 84 hmuhchhuah niin an zinga 42 hi Screening Point-a hri kai tih hmuhchhuah an ni a, midang 42 hi Screening Point-a negative, a hnu a hri kai tih hmuh leh an ni. Kanhmun Screening Point-ah hri kai 6 hmuhchhuah an ni a, Zokhawthar kaltlanga rawn lut Screening Point-a negative, a hnua hri kai leh si 5 an awm bawk. Positive hmuhchhuah thar zawng zawng zinga 580 (61.20%) hi tualchhunga hmuhchhuah an ni a. Kumin January thla khan hri kai 156 hmuhchhuah an ni a, February-ah 51, March-ah 53 leh April thla ah ni 25 thlengin hri kai 934 hmuhchhuah an ni bawk.

Police Contact Tracing Team hotute report danin April thla chhunga hri kai hmuhchhuah 934 zingah hri an kaina chhuichhuah harsa 190 an awm a, April thla chhunga hri kai hmuhchhuah tawh zinga 509 (54.5%) hi tualchhunga inkaichhawng an ni a, midang 425 (45.5%) hi State pawn atanga lo lut (travel history nei) an ni. Aizawl khawpuia Local Council 84 zinga 70-in active case an nei a, tunhnaiah chhungkaw khata chengho zingah hri inkaichhawng an pung nasa a, chhungkaw member zawng zawng positive te pawh an awm tawh a ni. Tun thla chhunga Mizoram chhunga COVID-19 hri hluar zualna (hotspot) te chu - Bethlehem/Bethlehem Vengthlang-ah hri kai 71 hmuh an ni a, Borkolok, Lawngtlai District-ah hri kai 33 hmuh niin, Dam Veng-ah 31 leh Kanan Veng-ah 30 an ni a. Aizawl Municipal Area-ah Police te ngawrh takin chhun zan zawmin an duty a, COVID-19 Executive Duty te puibawm turin Police 90 ruat an ni tih tarlan a ni bawk.

Comments

Chhiar Hlawhte