Corruption Risk Assessment kalpui tan dawn

Lunglei DC Office Staff te hnathawh chak zawk leh langtlang taka kalpui anih theihnan leh District mipuite nena thawhhona tha tak a awm chhunzawm zel theihnana ruahman, Corruption Risk Assessment (CRA) chu Zirtawpni khan Lunglei DC Office-ah kalpui tan a ni.

Corruption Risk Assessment (CRA) bultanna puala DC Conference Hall-a Meeting neihah Lunglei DC, Kulothungan A chuan DC Office chu District mipuite nena in ngheng hnai tak leh District-a Sawrkar Department hrang hrang hnathawh khaikhawmtu an nih avangin an hnathawh a pawimawh takzet a ni, a ti a. DC Office staff-te chu an hma zawn theuha tih tur awmte uluk leh taima taka thawk chhunzawm zel tur leh mipui hamthatna dah hmasa zel tura chahin, Office thlen hma kawnga tan la tur leh tul hle ah lo chuan chawlh la lo turin a chah a. An hnathawhna kawnga harsatna an tawh te inthlahrung lova hotute hnena thlen vat thin turin a sawm bawk.

Corruption Risk Assessment (CRA) bultanna ah hian CRA Nodal Officer, James Miahlung chuan zirtirna pein he hmalakna thil tum tlangpuite a sawifiah a. Corruption chu sum kaihhnawh lam chauh ni lovin thuneihna hman sual te, mipuite tana harsatna siam sak te leh hnathawk muang thlengin a huam a ni, a ti bawk.

CRA kengkawh tur hian Lunglei DC Office-ah Staff member 15 awmna Working Group din a ni a, Corruption Risk Assessment hian Department leh Organization ten an hnathawhna kawngah hlemhletna, eiruk leh thuneihna hman sual theihna lai zawnchhuah te, Kalphung thalo lai te haichhuah a, tih dik dan kawng zawn te, Eiruk, hlemhlet leh thil diklo (unethical practice) ven leh tih tlem te, Langtlang zawka mipui rawngbawlsak te, Mipuiin organization-ah rinna an nghah deuh deuh theih leh Organisation in Service Delivery tha zawka a pekchhuah theih te chu a thiltum a ni.