Latest News

Airport kaltlang lut te ILP pek dan ti danglam hret

Mizoram sawrkar-a Home Department chuan COVID-19 hri leng vanga inkhuahkhirhna kalpui mekah Lengpui Airport kaltlanga khualzin rawn lut te fimkhur zawka ILP pekchhuah an nih theih nana registration tihna mPASS Flight chu tlemin a siam danglam a nih thu an sawi.

Hemi chungchanga thuchhuah an siamah Home Department chuan Thlawhna hmanga Mizoram-a rawn lut tur reng reng te chuan mCOVID-19 mobile application leh website www.mcovid19.mizoram.gov.in-ah lutin mPASS Flight-ah an in register tur a ni, an ti a. Mizorama rawn lut tur ILP mamawh te tan mPASS Flight chu Temporary ILP-ah rin nghal theihin ruahman a nih thu leh heng khualzin te mPASS Flight-ah hian ‘Temporary ILP’ tih a inziak tel tawh ang tih an tarlang a. Lengpui Airport-ah Temporary ILP Fee bituk ang an thehluh hnuah a hrana Temporary ILP lak a ngai tawh lo ang tih an tarlang a, mPASS Flight-ah hian Health & Family Welfare Department in khualzin lo lut te atanga hriattur pawimawh te dah tel vek a nih tawh avangin khualzin lo lut tur ten mPASS Flight hi an fill up ngei ngei a ngai tih an tarlang bawk.

Mizoram-a COVID-19 hri leng a darh zel loh nan Mizoram-a rawn lut tur te fimkhur taka chhinchhiah an ngaih avangin mPASS Flight hi ILP Sponsor tu, Mizoram khua leh tui dik tak chauhin a mi chhawr turte tan a dil tur a ni tih pawh tarlangin, mamawh tak takah chauh dil tur a nih thu leh dilna te hi uluk takin a endik thin thu an tarlang bawk.

Comments

Chhiar Hlawhte