Serchhip District-ah kumin hian thingtiak tam zawk phun turin hmalak a ni dawn

Thenzawl DFO, Margareth Lalramchhani chuan kumin ah kangmei avanga ramngaw tam tak tihchhiat a nih avangin kumin ah tingtiak tam zawk phun turin hma an la dawn tih a sawi.

Kumin Thal chho-a kangmei avanga Serchhip District leh an DFO huamchhunga ramngaw tam tak chhia chungchangah Thenzawl DFO chuan ramngaw kangchhia pawisalo an la awm thin chu pawi a tih thu sawiin, ramngaw venhim chu an Department, thawktu mi tlemte tan chuan tih vek theih a nih loh thu a sawi a. Mipuite pawhin kan Environment humhalh chu kan tihtur a ni tih kan hriata theihtawp kan chhuah tlan a tul thu a sawi bawk. Kumin ah kan ramngaw tam tak a kanchhiat avang hian theihtawp-a a siamthat hna thawh chu an Department pawhin an tihtur pawimawh tak a ni tih sawiin, hemi kawngah hian an theihtawp chhuaha hma an lak dawn thu DFO chuan a sawi a. An huamchhunga Forest Range Officer te pawhin kumin hian thingtiak a tam thei ang ber nei tura tan an lak dawn thu leh mipuite pawhin a remchanna hmun apiangah Seedballs kan tih ang chi, thing tiak awlsam Lamkhuang, Theihai leh a dangte thehdarh tura VC leh tlawmngai pawl dangte thawhpui an tum thu a sawi bawk.

Ram tikangtu manchhuah leh hremna pek chungchangah Thenzawl DFO chuan ram tikangtu tam zawk chu khawtlang mipuiten an sawi duh thin loh avangin ram tikang zinga hremna tawk chu mi tlemte chauh an ni thin tih a sawi a, ram tikangtu an hriat erawh chu hremna pek an nih thin thu sawiin, kumin ah mi pahnih man an neih tawh thu leh pakhat chu Lock-up ah dahin, mi pangngai phak chiah lo a nih avangin a lakah hremna lek vak theih a ni lo tih a sawi a, pakhat zawk hi a leipui hâl vanga ram tikâng niin, The Mizoram Prevention and Control of Fire in the Village Ram Rules, 2014-in a hremna a lek theih zat, Rs.50/- aia tamlo tih a nih angin Rs. 50/- an chawitir tih a sawi a. Police lam pawhin ram tikângtu hi man an nei thin tih sawiin, Police lam hi chuan ram tikangte hi an thil tihsual dan a zirin IPC behchhanin thubuai an siamsak a, pawisa chawi mai bakah lung In-a khung thlenga hrem an nih theihna turin hma an la thei tih a sawi bawk.

Tunhnaia Serchhip District chhunga ram kang thelhtu mi tlawmngai te chungah Thenzawl DFO chuan lawmthu sawiin, ramngaw hlutna hria mi tam tak kan la nei chu mipui zirtirna kawnga an hma lo lak tawhna hlawhtlinna pakhat ah an ngaih thu a sawi a. Kumin chhung hian Serchhip RO huamchhunga ramkang thelhtute mamawha hman turin Rs. 40,000/- an sem tawh thu pawh sawiin, heng te hi Serchhip-a YMA Branch 6, VC pakhat leh khaw pawn-a khaw 6 bakah Fire Department te hnenah hlan a nih thu a sawi a. Hei bakah hian DFO Office atangin Serchhip Sub-Hqrs. YMA kutah Rs. 20,000/- leh Thinglian leh Hmunzawl vel ramkang-a a tul anga hman turin DC Office kaltlangin Rs. 20,000/- an hlan tawh thu a sawi bawk.