Latest News

Chanchin thar thenkhat :

 Lungsen-ah Vawk 320 thi tawh

Lunglei District chhung Lungsen khua-a Vawk hri leng mek a hmunah a enfiah hnuah AH & Vety Minister, Dr. K. Beichhua chuan nimin khan Lunglei DC Conference Hall-ah sawrkar mi pawimawh te hri a darh zau zel lohna tura hmalak dan tur a sawipui a. He hunah hian Tlabung Veterinary Officer, Dr. George Martin Lalruat-tluanga chuan nimin chawhnu dar 1:00 thlenga Lungsen-a Vawk thi tawh zat chu a vaiin 320 a nih thu sawiin, darkar 24 chhungin Vawk 44 a thi tih a sawi. Chief Veterinary Officer Tlabung Dr. K. Lalhlimpuii chuan The Prevention & Control of Infectious and Contagious Diseases in Animals Act, 2009 Section 20 behchhanin Lungsen khaw pumpui chu April ni 1 (Ningani) atanga thu leh awm hma chu Vawk hri lenna hmun (Infected Area) ah a puang tawh a ni.


Kolasib DC in tlawh

Kolasib District Bawrhsap, Dr. H. Lalthlang-liana chuan nimin khan Vairengte leh Saihapui V-a BSF duty-na hmun thawmthat mek leh Screening Point a tlawh a, Vairengte CHC leh Police Station pawh tlawhin NGO hrang hrang hruaitute nen SDO (C), Vairengte pisa-ah inkawmna hun a hmang bawk. He hunah hian Kolasib DC chuan Covid-19 hrileng thawhhnihna thleng mek laka Mizoram kan him theih nan tha thlah lova thahnem ngai tak a thawhho chhunzawm puiah a sawm bawk. Kolasib DC hian Zero point, Bairabi road leh Bilkhawthlir inkar kawng siam mek a tlawh bawk.


VC bye-election nei dawn

Mizoram State Election Commission chuan Aizawl Municipal Corporation hnuaia Republic Local Council-a member, Lalremtluanga chu a boral avangin a seat ruak hnawhkhat turin Bye-Election chu May 4, 2021 khian neih a nih tur thu thuchhuah siamin a tarlang a. He inthlanna chuh tumte tan hian tun thla ni 16 thleng hming pekluh theih a ni anga, ni 19 thleng inhnuhdawh theihna hun hawngin May 4-a Vote thlak zawh a nih hnu hian Vote tla te hi chhiar nghal a ni ang.


Central YMA in tanpuina hlan

Central YMA chuan March 13, 2021-a Aizawl Maubawk Veng-a kangmei rapthlak tak tuar te tanpuina atan nimin khan Rs. 27,13,305.50 leh Buhfai bakah thawmhnaw chi hrang hrang an hlan. Central YMA hian tunhnaia Serchhip Dinthar Veng-a kangmei tuar chhungkaw 4 te tanpuina atan Rs. 10,000/- chu Sub-Hqrs. YMA kaltlangin Dinthar Branch YMA hnenah an hlan tawh a ni.


Thiamsanga Award hlan

Mizoram sawrkar-a Health and Family Welfare Board Vice Chairman, Dr. ZR. Thiam-sanga MLA chu midang ten nunna an neih nan theihtawp a chhuah vang te, midang te fuih leh cho tho tura thil chhinchhiah tlak tak tak a tih avangin India International Friendship Society (IIFS) chuan nimin khan Rashtriya Gaurav Award  an hlan.

Comments

Chhiar Hlawhte