Latest News

Academic Session thar-a School tan hun tur hriat theih ala ni lo - Education Minister

School Education Minister, Lalchhandama Ralte chuan hri leng avangin Academic Session thar tan hun tur hriat theih ala nih loh thu a sawi.

School Education Minister Lalchhandama Ralte chuan thuthar thehdarhtute zawhna chhangin, State Disaster Management Authority hnuaia State Executive Committee (SEC) thu angin, May 4, 2021 atanga School kal tan hun tura ruahman tawh chu sût a nih thu leh notification tihchhuah a nih tawh thu a sawi a, “Sikul kai tan theih a nih dawn loh avangin online hmanga zirna kalpui turin zirtirtute hriattir an ni,” a ti. Minister chuan, School kai tan hun tur sawi lâwk theih a nih loh thu sawiin, “Ruahmanna kan lo siam tawh pawh Covid-19 avangin sût a ngai leh thin a, a buaithlak khawp mai. Kan boruak thlir chung leh SEC-te rawn chungin sikul kal hun tur la rel that leh a ni ang,” a ti a; ruahman lâwk angin School kai tan theih ni lo mah se, syllabus tihtlem leh tihtlem loh chungchang an la rêl loh thu a sawi bawk.

HSLC leh HSSLC exam result chu a hun tur ruahman lâwkah tihchhuah tum a nih thu sawiin Lalchhandama Ralte chuan, “Chutih rualin, kan hma hun a hriat loh a, hripui vangin harsatna a awm chho dawn, Exam paper endik kawngah harsatna te a awm dawn em hriat a ni lo. Ruahman lâwk hunah tihchhuah tum mah ila, tihchhuah theih a ni lo thei ve tho bawk,” a ti.

School Education Minister chuan, Covid-19 leng avangin HSLC exam chhunzawm thei lo mi pahnih an awm thu sawiin, anni tan hian an sawi lawk tawh angin exam hun a hranpaa siam leh tum a ni tih a sawi a, HSSLC lamah chuan Covid-19 avangin exam-ah harsatna nei an la hrelo tih sawiin, Chawngte-ah Containment Zone puan awm mah se, HSSLC exam turte chu ngaihnathiam an nih thu a sawi bawk.

HSLC exam hi April 15 khan zawh a ni tawh a, June thla chawlhkar hmasa berah result tihchhuah tum a ni a. HSSLC exam chu April 30-ah zawh tur a ni a, June thla chawlhkar hnihna emaw, chawlhkar thumnaah emaw result tihchhuah tura ruahman a ni bawk.

Comments

Chhiar Hlawhte