Latest News

Tunhnai chho ah Serchhip District-ah chhan hriatchian lohin Vawk 11 a thi tawh

Tunhnaiah Serchhip District-ah chhan hriatloh in Vawk 11 zet an thi tawh a, hemi avang hian nimin khan Serchhip-ah ramri kaltlanga ran natna inkaichhawn theih hrang hrang laka inven dan tur chungchang inzirtirna neih a ni.

Serchhip District AH&Vety Office-a he hun buatsaih hi Serchhip DVO, Dr. R. Lalmakthanga chuan kaihruaiin tunhnaiah Lunglei District chhunga Lungsen khua ah chhan hriatloh in Vawk 100 chuang a thih tawh laiin Serchhip District chhunga khaw thenkhat ah pawh a chhan chiang taka la hriat lohin Vawk 10 chuang a thih tawh thu a sawi a. Heng Vawk thi te hi Keitum-ah 8 bakah Kanghmun South, Thenzawl leh Chhingchhip-ah pakhat theuh a nih thu a sawi. Mizoram in PRRS leh Classical Swine Fever (CSF) avanga harsatna kan lo tawh thin te sawiin Serchhip DVO chuan, tuna Mizoram-a Vawk thi te hi a sample an enfiah tawh ah PRRS leh CSF a ni lo tih finfiah a nih thu a sawi a, hei vang hian African Swine Fever (ASF) a nih rinhlelhna lian tak a awm thu leh phai lama enfiah a nih zui dawn thu a sawi a. He hri hi a rawn lut hlauh a nih chuan harsatna nasa tak kan tawh dawn avangin he hri a rawn luh lohna tura hma lo lak chu a tul avangin hetiang hun hi buatsaih a nih thu a sawi bawk.

He hunah hian VC, YMA, Vawk vulhtu leh ran lalut thin bakah Sazuar Association aiawhte tel tura sawm niin Serchhip DVO Office-a Chief Veterinary Officer (CVO), Dr. Thangzadinga chuan African Swine Fever (ASF) chungchang a zirtir a. ASF chu Vawk natna hlauhawm tak a ni tih sawiin, he natna kai Vawk te chuan an thihpui ngei ngei-a ngaih a nih thu leh lo thi lo palh a awm a nih pawhin a damdawi a awm loh avangin a damchhung zawng hri thehdarhtu a nih tawh zawk tur thu a sawi a. He hri hi kan ram ah a rawn lut hlauh a nih chuan Vawk bakah ran dang sa zawng zawng thawnchhuah khap a nih dawn thu leh hri lenna hnaivai-ah chuan Vawk te chu suat vek tur a nih dawn thu sawiin, hei hian harsatna nasa tak a siam nghal dawn thu a sawi a. Hei hi hre lovin mi thenkhat in a ruk-a Vawk te, a sa a rep-a lo lalut te an awm thin chu a pawi hle tih a sawi a. Hri len lai a nih avangin Vawk leh a sa lakluh rihloh a pawimawh thu sawiin, hemi atan hian Department hmalakna ringawt a tawk zo lo a, kan vaia kan tantlan a tul thu a sawi bawk.

Hemi hnu hian Dr. H. Vanlalrawna, VO chuan African Swine Fever laka inven dan tur chungchang sawiin hmun dang atanga ran lakluh rih miah loh te, ran In-ah a enkawltute pawh inkalpawh loh a that zawk thute sawiin, damdawi hmanga ran In leh a vel te silfai thin a that thu a sawi a. Ran damlo reng reng chu hralh emaw, talh loh tur niin, ran thi chu paih mai lova thuk taka chinai nen phum thin tur a ni, a ti a. Ran thi an awm in AH & Vety thawktute hriattir vat thin turin mipuite a chah bawk.

Comments

Chhiar Hlawhte