Speaker Meeting-ah Lalrinliana Sailo a tel

Lok Sabha Speaker, Om Birla chuan nimin tlai khan India rama State leh Union Territory zawng zawnga Legislative Assembly leh Legislative Council Speaker leh Chairman te chu Video Conference kaltlangin Meeting a neihpui.

He Meeting-ah hian Mizoram atangin Mizoram Legislative Assembly Speaker, Lalrinliana Sailo bakah Deputy Speaker Er.Lalrinawma, Parliamentary Affairs changtu Minister TJ. Lalnuntluanga leh Opposition Group Leader Vanlalhlana te an tel a. He hunah hian Mizoram Assembly Speaker, Lalrinliana Sailo chuan Mizoram COVID-19 dinhmun sawiin, sawrkar hmalakna hrang hrang a tarlang a. Mizoram MLA ten COVID-19 dona tura an hlawh atanga sum engemawzat an lo thawh tawh thu te sawiin, MLA te leh sawrkar hmalakna piah lamah tlawmngai pawl te, kohhran te leh mipuiin COVID-19 dona kawnga an thawhhlawk zia sawi bawk a ni.

Assembly Speaker chuan ramchhunga COVID-19 a len tan tirh, kum kalta khan rampum lockdown a nih hma hauhin Mizoram-ah lockdown puan a lo nih tawh thu te, nikum March thla laihawl atang tawha Rapid Antigen Test hmanga ramri luhka zawng zawnga test kalpui a lo nih tawh thu a sawi bawk a. Amaherawhchu, vanduaithlak takin COVID-19 hrileng thawhhnihna in India rampum a tuam mek laiin Mizoram-ah pawh case a pung chak hle tih a sawi a, COVID-19 Second Wave dona kawngah Mizoram Sawrkar chu nasa takin a inbuatsaih mek a ni, a ti bawk.