Lunglei-a kangmei chhuak zaa 90 thelh a ni tawh

Tunhnaia Lunglei khawpui hnuaia kangmei chhuak rapthlak tak chu zaa 90 aia tam thelh a ni tawh.

Inrinni zing atanga Lunglei-a kangmei chhuak hi Veng hrang hrang ramah kangkaiin Inrinni leh Pathianni bakah nimin thleng khan mi tlawmngai leh inpe ten theihtawp chhuahin an la thelh zel a, kangmei thelh tura kal Indian Air Force (IAF) atanga Helicopter deploy pawhin nimin zing atang khan Lunglei-ah hmalakna neiin IAF Helicopter Mi-17V5 hian Litre 3500 dawng Bambi Bucket hmangin nimin tlai dar 3:55 leh 4:22 inkar khan Zotlang ram kang mek thelh tumin tum hnih tui a phuh a. Hemi hnu hian nimin atan chawlhsanin a tul a nih chuan Vawiin hian chhunzawm leh a ni anga, sawrkar thuchhuah chuan tunah hian kangmei hi zaa 90 thelh a nih tawh thu an tarlang a ni.

Lunglei in kangmei an tawrh mek hi EF&CC changtu Minister, TJ. Lalnuntluanga leh MLA 2- Dr. Vanlaltanpuia Lalrinsanga Ralte te chuan a hmunah tlawhin an enpui a, EF&CC Minister chuan ram kang avanga Lunglei mipuite thlabar taka an awm chu Sawrkar in pawi a ti takzet tih a sawi bawk.