Latest News

Candidate hrang hrang ten tlin an inbeisei

Serchhip bial MLA bye-election neih zawh takah Ccandidate hrang hrangte chuan tlin an inrin thu an sawi a. Independent Candidate Ramhlun Eden-a erawh chuan Vote thlak kher a tulloh thu a sawi thung.

ZPM Party Candidate Lalduhoma chuan, Serchhip bial MLA bye-election ah hian hnehna chan nawn a inbeisei thu sawiin, “A hmasa ai pawhin hnehna a san zawk ka beisei,” a ti a. Vote thlakna hmun te a fan kualnaah mipui hmelah ZPM duhna a lan thu sawiin, “Kan chunga rorelna lo thleng hi mipuite hian sut leh an duh a, Law Court a kal lovin Mipui Court-ah kan kal a, mipui hian ro min relsak an chakin ka hria a, chu chu an hmelah langin, an phur tih pawh a lang,” a ti a. Rorellai MNF boruak lian tak nia sawi chu a huphurh lem loh thu sawi bawk.

MNF Party Candidate, Vanlalzawma chuan, Pathian leh mipui zarah tlin a inbeisei thu sawiin, “Kan tlawh chinah mipui che vel leh kan mi leh sa te phur dan enin tling turah ka inngai deuh a,” a ti a. Tlin a inrin chhanah rorellai an nih vang leh an party hotute'n theihtawp an chhuahpui bawk avangin tlin mai a in rin thu a sawi a ni.

INC Ccandidate, PC. Laltlansanga pawhin, politics hi tunhma ang a nih tawh loh avangin tute mai pawh hi eng party thlawptu nge tih hriat hleihtheih an nih tawh loh avangin eng party nge chak dawn tih rin dan neih theih a nih tawh loh thu a sawi a. “Party tinin keimahni lawmna tawk hi chu kan hmu theuhin ka hria. Chutiang karah chuan beiseina sang tak ka nei a ni,” a ti a. “Tlin inbeiseiin theihtawp kan chhuah a, kan beisei chu result tha tak neih a ni. Kan beisei ang a thleng lo a nih pawhin min duhsaktute chu hnual mai lo turin ka chah a ni,” tiin, tun dinhmunah hi chuan tling tura hun nei tha berah a inngaih thu a sawi.

Tun inthlanna inbuatsaihna atan thla khat vel chiah hun a neih thu sawiin, BJP Candidate, Lalhriatrenga Chhangte chuan, “Pathian ah ka innghat a. Kum 2018 kum tawpa Pu Duhoma a tling ang khan tlin ka inbeisei,” a ti a, “Serchhip bial vil zui kawngah ka tlin leh tlinloh hi a inang reng,” tiin Serchhip bial inthlanna felfai tak neih a ni chu lawmawm a tih thu leh amah duhsaktute bakah hruaitute chungah lawmthu a sawi bawk.

Hetihlai hian, Serchhip Assembly bye-election ah hian Independent candidate Ramhlun Edena chuan vote thlak ve a duh lova. Vote a thlak loh chhan zawhna chhangin, Pathian thu lam atanga a dawn dan a nih thu leh vote thlak a rem loh vang anih thu a sawi a. Inthlannaah Independent a nomination a file chhan chu, “Pathian in Zoram politics her a tum dan leh Pathian Lalram sawrkar din a tum dan puanchhuahna leh hunruk ram kharna atan a ni a, hun sarih ram lut turin Lal Isua zirtirna zawk a lut tur kan ni tih puanchhuahna platform-a hman a tawk mai,” tiin Vote thlak kher a tul loh thu leh a remchan loh thu a sawi bawk.

Comments

Chhiar Hlawhte