Chanchin thar thenkhat :

Mizoram-a rawn lut khunghran leh an ni dawn

Mizoram State Disaster Management Authority chuan hun reilote chhung châm tur (short stay) tiam lovin Mizorama rawn lut zawng zawng chu quarantine vek tur a tih avangin Sawrkar chuan institutional, khawtlang (community) leh hotel/ homestay quarantine te chu tharthawh leh tha a ti a, hei hian mahni In-a inkhunghranna tur neilo te harsatna pawh a sutkian beisei a ni. Sawrkar in sum harsatna a tawh mêk vang leh inren-chemna a kalpui mek avangin inkhunghranna senso zawng zawng chu Sawrkarin tumsak vek lovin inkhunghranna senso hi mahni intum tur a ni thung ang. Mizoram-a lo lut reng reng chu Mizoram an lo luhna (Point of entry)-ah Rapid Antigen Test (RAgT) hmanga en dik vek an ni anga, hri kai lo te chu ni 7 chhung inkhunghran tur niin ni 7 hnuah RT-PCR/TrueNat test an nei anga, negative result an neih chuan inkhung zui a ngai tawh dawn lo a ni.

Ramkang chungchang thlirho

Nimin khan Siaha-ah District Fire Prevention Committee chuan thutkhawm hmanhmawh neiin Mizoram hmun hrang hranga ramkang leh an District chhunga niminpiah-a ramkang chungchang an sawiho a, Siaha District-a ram kang te  zirchiangtu tur Investigation Team din rel a ni bawk. He hunah hian NSS Govt. Saiha College atangin Thingtlang khaw 3 atanga Ram kan chhan an zirna ah, Lo/huan/Leipui hal hun sawrkar in a bituk chu an zawm thalo tih leh meikawng pawh an sial that loh thu bakah dan bawhchhia te pawh hrem an ni lem lo tih tarlan a ni a, Fire and Emergency Services Department in Fire tender 2 an kawl mek thu leh pakhat hi a fit tawk loh thu bakah Staff an indaih ngangloh thu tarlan niin Siaha Town atanga KM 20 aia hla an kang thelh motor an kalpui dawn chuan Aizawl lama an hotute dil phawt a ngaih thu tarlan a ni bawk.

IR Police driver boral

Assam leh West Bengal inthlana duty 4th IR Police te hruaitu 1st IR driver, PC. Lalawmpuia (48) chu nimin dar 3:15 khan an quarantine na tur, Rengdil-ah a boral a, nimin vek khan Kawn-pui khua-ah vuiliam tura lak a ni. Thudawn danin Lalawmpuia hi driver dangin motor an khalh chhawk laia a lo muhil chu nimin zing dar 3:15 a Rengdil an thlenin an kaitho zo ta lova. Covid test nghal niin hri a kai lova, hei vang hian a ruang pawh an khua ah hian lak a ni ta a ni. Assam leh West Bengal inthlana duty 4th IR Police, nimin zing-a Rengdil thleng te hi mi 86 leh anmahni hruaitu driver 7 an ni a, nimin khan an Sample enfiah sak nghal an ni bawk.

Inthlan hun tur sawn ani

Mizoram State Election Commission chuan XVII/2 -Republic Local Council-a bye-election neih hun atana May 4, 2021 alo ruat tawh chu COVID-19 hripui lek mek avangin Mizo-ram Municipalities (Election to Local Councils) Rules, 2015 in thuneihna a pek angin tiamchin awm lovin a sawn.

Ruahtui khawl zirhona nei

Nimin khan Lawngtlai-ah DRDA buatsaihin Jal Shakti Abhiyaan (JSA) hnuaiah ruahtui khawl pawimawhzia inzirtirna neih a ni a, he hun hi Lawngtlai District Bawrhsap, Dr. Andrew H. Vanlaldika chuan hmanpuiin tui chu thilnung tinin nunna leh khawsak nana kan mamawh bulpui ber pakhat a nih avangin ngaihthah a thiang lo tih a sawi a, tuihna tlem zel kara mihring pung zel vanga tui mamawh sang zel si-ah ngun taka ngaihtuahna sen a, a taka hmalak a tul takzet a ni, a ti. He hunah hian ruahtui khawl dan, ruahtui khawl tura hmalak a tul tawhzia leh tuihna tipung tura hmalak dan turte mithiam ten an zirtir a ni.

Hri vangin Vawk 1450 thi tawh

Tunhnaia Mizoram-a Vawk hri leng, African Swine Fever avanga Mizoram-a Vawk thi chu nimin thleng khan 1450 a tling tawh a, darkar 24 kalta chhungin Vawk thi 34 a awm leh bawk a ni. AH&Vety Department in an chhinchhiah danin Mizoram khaw hrang hrang zinga Vawk thi tamna ber Lungsen khua ah chuan Vawk 684 thi tawhin darkar 24 kalta chhung khan Vawk 13 a thi leh a, Aizawl Armed Veng ah Vawk 104 a thi tawh bawk a ni. Hetihlai hian Serchhip District-a hri vanga Vawk thi awmna Keitum khua ah chuan Vawk thi hi a awm belh leh tawh rihlo thung.