Mipui kaihhruaina siam thar a ni

Mizoram-ah COVID-19 hri kai hmuhchhuah an pun leh tak deuh avangin Mizoram sawrkar chuan mipui khawsak phung kaihhruaina Dan a siam thar a, zan lama inkhawm leh inkhawmna a zai reng reng phal a ni rihlo ang.

Hemi chungchanga Zirtawpni kalta zan-a sawrkar thuchhuah in a tarlan danin COVID-19 hrileng laka mipuite kan lo him zel nana March 23, 2021-a kaihhruaina lo tihchhuah tawh chu tunhnaiah COVID-19 hri a lo hluar chhoh leh tak avangin SOP hi ennawn leh inkhuahkhirhna thenkhatte pawh siam belh tul tih a nih thu a tarlang a. Hemi ang hian kaihhruaina thar hi tihchhuah niin hei hi thu leh awm hma chu Mizoram chhungah khauh taka kenkawh leh zawm tur a nih thu leh a hmaa Order awm tawh te pawh a luahlan nghal thu tarlan a ni.

He kaihhruaina thar ang hian India rampawn leh India ram hmun dang atanga Mizoram-a lo lut reng reng chu Mizoram an lo luhna (Point of entry)-ah Rapid Antigen Test (RAgT) hmanga en dik vek an ni anga, heta Negative te chu fimkhur takin mahni hriselna inchîk-in midang nena in-contact lovin ni 7 chhung inkhunghrang tura tih an ni. Amaherawhchu, an lo thlen hnuah RTPCR/TrueNat test an neih a, negative result an neih chuan inkhung zui a ngai tawh lo ang. Hetiang hian Mizoram atanga zin chhuak, lo haw leh te pawh endik vek tur an ni ang.

Hun reilo deuh, darkar 96 aia reilo Mizoram-a cham tura lokal te chuan Entry Point an lo thlen hmâ darkar 96 aia hlui lo RTPCR/TrueNAT/CBNAT (ICMR recognized laboratory) hmanga COVID-19 test result negative an neih a, Entry Point-ah Rapid Antigen Test negative result an neih bawk chuan inkhunghran a ngai lovang.

Mipui vantlâng tana inkhuahkhirhna pawh siam danglam leh niin zan lam Curfew hun chu pawhsei niin District Hqrs. ah te chuan zan dar 8:30 atanga zing dar 4:00 inkarah pâwn chhuah khap tlat a ni dawn a, loh theihloh thil a nih loh chuan, kum 65 chin chunglam te, taksa hriselna lama harsatna nei sa te (Chuap thalo, HIV positive, Zunthlum nasa, Lungna, Kalna, leh adt., nau pai te leh naupang kum 10 hnuailam te chu pâwn chhuah loh hrâm tur a ni.

Zirna In hawn chungchangah Pawl 8 leh a hnuailam zawng chu sikul kal lovin online mode-in zirtirna kalpui tur a ni a, May 4, 2021 atanga School luh tan tura ruahmanna pawh sut leh a ni. Hei hian Mizoram chhunga Kendriya Vidyalaya, EMRS, JNV leh ICSE/CBSE zawm School te pawh a huam ang. Pawl 8 leh a hnuai lam promotion exam tur pawh online exam emaw, internal assignments/tests an lo neih tawh atanga assessment siamin result siam tur a ni bawk. Anganwadi Centre pawh hawn rihloh tur a ni a, amaherawh chu, naupang ten Nutrition an dawn tur zawng zawng an dawn ngeina turin Women & Child Development, Social Welfare & Tribal Affairs Department-in ruahmanna a siam ang.

Sakhaw Biak Inkhawm chungchangah thu leh awm hma chu Zan Inkhawm neih loh tur a ni a, Inkhawm chhungin zaiho leh hla sak phal a ni lova, hei hian Solo, Duet, Trio leh Quartet te pawh a huam ang. Mitthi vuina leh inneihna (man hlan, inneih inkhawm leh reception)-ah a hmun-a leng zat zaa 50 aia tam lovin a punkhawm theih anga, pungkhawm te hi mi 50 aiin an tam tur a ni lo. Hei hian In chhung leh pawna awm program-a tel zawng zawng a huam ang. Chhiatni/thatni puipunna hmunah te mipui a huhova zaikhawm leh hla sak khap a ni a, hei hian Solo, Duet, Trio leh Quartet te pawh a huam anga, Chhiatni/thatni-ah hian ei leh in siam leh sem loh tura tih a ni bawk.

Entu mipui tel lovin Games & Sports practice leh Tournament huaihawt theih a ni anga, Cinema Hall, Auditorium, Community Hall, Picnic Spot leh intawllenna hmunah te punkhawmna tur hmuna leng zat zatve (za a 50) aia tam lovin a punkhawm theih anga, pungkhawmte hi mi 50 aiin an tam tur a ni lo thung. Sawrkar programme leh pawl thil a punkhawmna dang reng rengah punkhawmna tur hmuna leng zat zatve (zaa 50) aia tam lovin a punkhawm theih anga, pungkhawmte hi mi 50 aiin an tam tur a ni lo. Heng hmunah te hian mipui a huhova zaikhawm khap niin mal zai (solo) leh Group zai (Duet, Trio leh Quartet) te pawh a huam ang.