Latest News

Mizoram-ah Vawk 671 a thi tawh; Sample thawn atangin ASF hrik hmuh a ni

Nimin thleng khan Mizoram hmun hrang hrangah Vawk pul hri vangin Vawk 671 an thi tawh nia chhinchhiah a ni a, heng Vawk thi te hian African Swine Fever (ASF) hri an kai tih hmuh a nih tawh avangin nimin khan AH&Vety Minister Dr. K. Beichhua hovin, African Swine Fever chungchanga hmalak dan tur ngaihtuah a ni.

Mizoram-a Vawk pul hri leng mek hi African Swine Fever (ASF) a ni ngei em tih finfiah turin National Institute of High Security Animal Diseases (NIHSAD), Bhopal-ah April 8, 2021 khan sample thehluh a ni a, Laboratory-ah PCR hmangin heng Sample te hi ASF positive tih hmuhchhuah a ni tawh a, a Serotype hriatna turin Genome Sequencing tih leh a ngai a. Niminpiah-ah tih tan niin result hi Vawiin-ah emaw, naktuk-ah emaw hriat theih beisei a ni a. NIHSAD, Bhopal hian ASF a ni tih an nemngheh chuan sawrkar laipui-ah an report ang a, Mizoram state chuan sawrkar laipuiin dan ang taka an puan hun a nghak a ni.

Nimin-a AH & Vety Minister hova thutkhawm hi SAD Conference Hall-ah neih niin Chief Secretary, Lalnunmawia Chuaungo bakah sawrkar department hrang hrang hotulu te an tel a. Khawvel ramdang leh India ramchhung ngeia Vawk nuai tam tak suattu hi Mizoram-ah a lo luh ve tak avangin engtia hmalak chhoh zel tur nge tih ngaihtuah a ni a. He Vawk pul hri darh chak tak hi enkawl dam theih a nih loh avang leh vaccine a awm loh avangin Mizoram pumah a darh lohna tura rang taka inven a ngai a. AH&Vety Department-in ruahmanna a siam te thlirho niin hmalak dan tur an ngaihtuah a. COVID hri leng ang bawkin sawrkar chauh ni lo, mipui mimir tan tlan a ngai nasa hle dawn niin thutkhawm ah hian sawilan a ni.

Mizoram chhungah Infected area-a puan tawh te chu Lungsen, Lunglei District; Electric Veng, Lunglei; Zawlnuam, Mamit District bakah Edenthar leh Armed Veng, Aizawl te an ni a, Lungsen-ah tukin thleng khan Vawk 431 an thi tawh a, Mamit District-ah 117, Eden-thar-ah 73, Armed Veng-ah 42, Electric Veng Lunglei-ah 8 an thi tawh a ni.

ASF hi Vawk thi tawh lehVawksa ah rei tak a nung thei a. ASF vanga Vawk thite hi halral emaw, thuk taka phumbo an nih loh chuan an ruang leh sa-ah rei tak chhung a nung a ni. Frozen meat/Processed Meat ah te, Vawksa rep-ah te pawh rei tak chhung damin mihring pawh a thehdarhtu ah a tang thei bawk a ni.

Comments

Chhiar Hlawhte