Latest News

‘Peace Bonus’ leh ‘Paragliding Site’ sawifiah

MNF Party Adviser, Robert Romawia Royte chuan nimin khan Aizawl Club-ah thuthar thehdarhtute kawmin ‘Peace Bonus’ leh Serchhip a ‘Paragliding Site’ chungchang a sawifiah.

He hunah hian Robert Romawia Royte chuan kum 2000-a Mizawram Sorkarin Peace Bonus sum cheng vbc. 182.50 a hmuh, NLCPR Fund, State dangte pawhin an hmuh ve tho anga Lalduhoma’n September 2020 Assembly Session-a a sawi chu thudik lo a nih thu sawiin, “Peace Bonus sum kha Pu Zoramthanga’n a bik liau liauva a dil chhuah a ni a, NLCPR Fund ni lovin Finance Ministry-in a sanction a ni,” a ti.

Robert Romawia Royte chuan, “Peace Bonus hi kum 2000 hma lamah kan hre ngai lo, khatih laia kan Chief Minister zahawm tak Pu Zoramthanga’n a ngaihtuah chhuah leh a rawtna angin Ministry of Finance chuan kum 2000 khan Mizoram sawrkar hnenah cheng vbc. 182.50 a pe a. He Peace Bonus hi khatih laia Central Sawrkar khan a bika Mizoram tan an ngaihtuah a, an sanction a ni. NLCPR Fund a ni reng reng lo,” tiin he hunah hian hemi nemngheh nan hian Peace Bonus chungchanga Central Sawrkara Finance Ministry lehkha pawimawh copy-te chu a sem nghal bawk.

Serchhip-a Paragliding Site chungchang pawh sawiin Robert Romawia Royte chuan, “India ramah pawh a hmun hi a tha pawl nia sawi a ni a. MASA (Mizoram Aero-sports Association) thahnem ngaihna leh bultanna in Chief Minister hovin Tourism Department-in a tul tinreng kan buaipui a, MASA DPR siam chu June ,2019 daih tawh khan CM-in NEC-ah Tourism Minister-in sanction a nih theih nan a tul angin hma la rawh se, tia ziaka min hrilh angin Tourism Department-in kan umzui a. PWD-te puihna leh counter-signing pawh kan la a. Tun dinhmun thlengin Serchhip Paragliding atan hian cheng nuai 488.81 zet NEC-in a sanctioned tawh a. MASA-ah cheng nuai 468.81 a lut ang a, a bak cheng nuai 20 chu Tourism Department-ah a lut thung,” tiin Mizoram sawrkar pawhin cheng nuai 124.44 an seng tawh tih a sawi a. Mizoram sawrkarin theihtawp chhuaha hna a thawh laia Serchhip-a Common Platform-ah Ex-MLA, Lalduhoma’n ‘Kan Sports Minister hi rawn inrawlh ve lo se ka duh,’ a tih chu mak a tih thu leh Serchhip mipui pawhin mak an tih thu sawiin, sawifiah tura a phut thu a sawi bawk.

Comments

Chhiar Hlawhte