Chanchin thar thenkhat :

Bawlhhlawh dalna tur enfiah

Save Chite Lui Coordination Committee leh Aizawl DC-te tangkawpin Aizawl khawpui bawlhhlawh te Chite Lui-a a luanluh lohna tura dalna an siam chu Ningani khan AMC Executive Councillor, Solid Waste Management changtu, Laltlanzova Khiangte hovin a hmunah en a ni a. Bawlhhlawh dalna hi Theihai Lui-in Chite Lui a finna bulah leh Mirawng Lui-in Chite Lui a finna bulah te enchhinna atana siam phawt a ni a. A siam dan fuh tawklo laite thlirho a ni a, tha zawka thuamthat zui dan turte pawh sawiho a ni bawk.

LADC Budget Session zawhfel a ni

Thla hlui March ni 26 atanga neih Lai Autonomous District Council Budget Session chu Ningani khan zawhfel a ni a, Session tawp ni hian kum 2021-2022 chhunga LADC sum hman tura ruahman cheng nuai 19,000 leh Supplementary Demand for Grant 2020-2021 cheng nuai 700.51 te passed a ni a, Budget-ah hian tualchhung atanga sum hmuh beisei zat cheng nuai 245 a tel a ni. Session tawp ni-ah hian Eptu Member te chuan Hnam chungchang House-a CEM thusawi chu duh lovin ngaihdam dil a, a thusawi sut turin an phut a, hei hi CEM in a tih hlawhtlin theihloh vangin Budget hi pass puilovin, House an chhuahsan thung a ni. 

Tun tum LADC thutkhawm ah hian House-a chhan chi zawhna lut 17 zingah 16 chu chhan niin zawhna pakhat chu a zawttu tur a awmlo thung a, ziaka chhan hi zawhna lut 2 chhan a ni bawk.

Kum 45 chunglam hri danna pe

Ramchhung hmundangte rualin niminpiah, April 1, 2021 atang khan Mizoram-ah pawh kum 45 chunglam te COVID-19 vaccine pekchhuah tan an ni a. Aizawl-ah chuan Aizawl East huam-chhung hmun 4-ah vaccine hi pekchhuah a ni a, mi 230 te hnenah hri danna hi pek an ni a, an ni rual hian Vaccine dose 1-na la tawh mi 308 te chu 2nd Dose pek an ni bawk. Ningani vek khan Serchhip-ah pawh kum 45 chunglam tan CO-VID-19 vaccine hi pek tan a ni a, mi 20 hnenah Dose 1-na pek niin hemi rual hian mi 147 te hnenah Dose 2-na pek a ni bawk. Health Department atanga thudawn danin, tun dinhmunah Mizoram in COVID-19 vaccine dose 1,28,840 dawng tawhin mi 52,882 hnenah vaccine hi pek a ni tawh a, mi 12,018 te chuan Dose 2-na an la tawh a ni.

Siaha-ah Class tan a ni

Kumin January 29-a Siaha-a MYC Coaching Centre hawn a nih hnuah Ningani atang khan Class kalpui tan a ni a, Batch hmasa ber te tan MPSC leh MSSSB course kalpui tan a ni a, Student 12 awm mekin, Faculty Member 3 leh Coordinator pakhat ten MYC Coaching Centre hi an vil mek a ni. Competitive examination a tawn hriat ngah tak Siaha-a awm mek Officer 3/4 chu Visiting Faculty Member atan a inpe a, heng zingah hian District Bawrhsap, Kesavan R, IAS pawh a tel a ni.

Kohhran ni pawimawh hmang

Nimin April 2, 2021 kha Kristian te ni pawi-mawh, khawvel sual tlan tura Isua Kros-a khen-behna ni, Good Friday a ni a, nikum lamah hri leng avanga Kohhran ten a huho-a he ni an hman theihloh hnuah kumin hian mipui ten an hlutin hmun hrang hrangah inkhawm pawh an thahnem hle niin a lang a, nizan lam thleng khan Kohhran thenkhat chuan hun an hmang a ni. Hetihlai hian naktuk Pathianni hi Isua Krista thihna hneh-a a thawhlehna ni, Easter Sunday niin Kohhran ten urhsun takin an hmang leh bawk ang.

Neihloh-ah MNF VC ding

MNF Party chuan Neihloh khua a Village Council-a President, Pianmawia leh Treasurer Thanthiangi te bakah Secretary, H. Lalthakima te chuan MNF zawmin a hmaa Congress VC din thinna ah MNF VC a ding ta tih an sawi a, MNF Adviser Lalchhandama Ralte chuan heng mite hi a lawmlut tih an sawi bawk.