Latest News

Mizoram-a kum 18-45 te COVID-19 hri danna a thlawna pek tur an nih leh nihloh hriat ala ni lo

Kum 18-44 inkarte tana Covid-19 hri danna (vaccine) pek tur chungchangah Mizoram-a hri danna dawng thei turte a thlawna pek tur a nih leh nih loh hriat theih a la ni lo.

Ramchhunga COVID-19 Vaccine pek hna kalpui mekah Sawrkar laipui chua May ni 1, 2021 atangin rampumah kum 18-44 inkar te tana COVID-19 hri danna pek chhuah anih tur thu a lo puang tawh a, hemi atan hian Mizoram sawrkara Health Department pawhin inbuatsaihna an kalpui mek a, State engemaw zatin COVID-19 hri danna hi mipuite ah a thlawna pek an tum thu an puan tawh laiin, Mizoram dinhmun tur erawh hriat theih a la ni lo.

Zawhna chhangin Health Minister Dr. R. Lalthangliana chuan, kum 18-44 inkar te tana COVID-19 hri danna pekchhuah dan turah sawrkarin ngawrh taka ngaihtuahna a sen mek thu a sawiin, “A thlawna pekchhuah tur a nih leh nih loh chungchangah thutlukna engmah siam a la ni lo,” a ti a. Hei hi chu thuneitu sang, a bik takin Chief Minister te nena sawiho ngai chi a nih thu leh sum tam tham tak inrawlhna tur a nih avangin ngaihtuahna uluk taka an sen mek thu a sawi a ni. 

Dr. R. Lalthangliana chuan, hri danna pek tur chungchangah hian rilru fim taka ngaihtuah a ngaih thu sawiin, hamhaih leh thlabara chi-ai zawnga awm an tum loh thu a sawi a, “Sawrkar laipui hi tawngpawng va nawr chiam chi pawh a ni lova, sawrkar pawh ngaihtuahna seng vak lova awm pawh kan ni lo a. Chutih laiin, thil tih phut phut pawh awmzia a awm miah lo,” tiin, mipui te chu lo chi-ai lo tur leh dawhtheihna nena lo nghak hram hram turin a chah a. Kum 18-44 inkar hri danna pek tur chungchangah thutlukna siam la ni chiah lo mah se, hri danna mamawh zat tur te, hri danna la thei tur mihring zat te chhut lawk a ngaih thu leh pawisa ngai zat turte nen lama an inchhut lawk tih sawiin, “Hri danna la thei tur mihring zat hi a chiah hriat theih ni lo mah se, nuai 5-6 vel ni turah kan ngai a. Tuna hri danna la tawhte zingah kum 18 chunglam te an awm dawn a, he'ng ho te hi paih leh vek an ngai dawn a ni,” Health Minister chuan a ti bawk.

Health Department hotute chuan, Private damdawi In te pawhin hri danna hi an pe thei dawn tih sawiin, amaherawh chu, State sawrkar atangin hri danna hi la thei lovin, vaccine siamtute atangin a hranpa liau liaua an chah a ngai dawn niin an sawi thung.

Comments

Chhiar Hlawhte