Latest News

COVID-19 hri kai pung chak vangin Mizoram-ah hri danna lak duh an pung nasa

Tunhnaia Mizoram chhungah COVID-19 hri kai pung nasa chuan COVID-19 hri danna (vaccine) lak duha inchuhna thlengin hri danna sem chhuaktute lu a ti hai hle nia thudawn a ni a, sawrkar laipui in ruahmanna a siam angin thla thar May thla atangin kum 18 chunglam te hnenah hri danna hi hi pekchhuah tum a ni.

State Immunisation Officer, Dr. Lalzawmi chuan, ramchhungah COVID-19 hri kai an pun tak thur thur hnu hian a bik takin hri danna la duh an tam sawt hle tih a sawi a. Hei vang hian mipui lam atang pawhin nawrna an dawn nasat thu sawiin, “Hri danna lak duha inchuhna nasa hian lu hai lutukin min siam a ni,” a ti. Dr. Lalzawmi chuan, tun dinhmunah vawi leh khata COVID-19 hri danna hi mipui zawng zawng an pek theih loh thu leh a tahtawla an inpek zel tur thu a sawi a. COVID-19 hri danna lak theih dan talh dappui tura ngenna an dawn nasat avangin hrehawm an tih thu leh hriatthiam an ngaih rih thu sawiin, “COVID-19 hri danna hi kan dawng vek dawn a. Mipuite hian kan hun (category) a inherchhuah hun lo nghak hram hram se kan duh hle,” a ti.

Tunkar Thawhlehni khan COVID-19 hri danna hi 50,000 dawng tura an inbeisei laiin nuai khat a lo thlen avangin a hmaa neihsa ho pawh District hrang hrangah sem chhuah vek a ni tawh tih sawiin, Vawiin atangin Aizawl khaw chhung tan pekchhuah hna an tan leh dawn tiha  sawi a. Chutih laiin, tunhnaiah hri kai thar an pun nasat avangin thawktute an indaihloh thu sawiin Dr Lalzawmi chuan, “CCC te hawn thar a nih avang leh case a tam avangin kha'ng kha buaipui a tul bawk si a. Mahse, Covid-19 hri danna hi Vawiin hian Aizawl khawchhung chu pek a ni dawn tho,” tiin, Session neih theih zat tur erawh an la hriat theih loh thu a sawi bawk.

State Immunisation Officer chuan sawrkar laipui ruahman anga thla thar, May ni 1 atanga kum 18 leh kum 45 inkar te hnena hri danna pekchhuah kawngah engtiang chiahin nge an kalpui dawn tih an la hriat loh thu sawiin, hei erawh hi chu Private Sector-ah pek a nih tur thu a sawi a. Hri danna la turte tan man chawi a ngaih tur thu leh a man zat turah hriattirna an la dawn loh thu sawiin, “Hri danna lak man erawh chu a to uchuak lo ang," a ti a. Tuna kum 45 chunglam tana an pek tawh ten hri danna an lak zawh hunah sawrkar hian tute nge pek chhunzawm tura a tih an la hriat loh thu a sawi bawk.

Tun dinhmunah COVID-19 vaccine hi tam tawk loh mah se a lungngaih thlak loh thu sawiin Dr. Lalzawmi chuan, tun April thla tawp thlenga mamawh tur anga an chhut kha a dik taka inpek pawh nise an indaih a inrin loh thu a sawi a. Frontline Worker leh Healthcare Worker Certificate nei, a hmaa inziaklutlo te pek an phal leh tak thu a sawi a. Tun thla chhunga mamawh ang tur an chhut zat dawng vek pawh nise indaih a awm theih a rin loh thu sawiin, “Hei rawh hi chu kan lungngai hran lo. Pek tura tih tawh sa min pe anga, kan mamawh dan a zir khan pek kan ni leh dawn tho,” a ti bawk.

Comments

Chhiar Hlawhte