Latest News

Chanchin thar thenkhat :

SVEEP Quiz Competition

Inthlan kaihhnawih inhrilhhriatna leh felfai taka vote thlak a nih theihna tura hmalakna, Systematic Voters’ Education & Electoral Participation (SVEEP) kaltlangin nimin khan Cham-phai-a I&PR Auditorium-ah High School zirlaite tan ‘SVEEP Quiz Competition’ neih a ni a, he hun hi Champhai DC leh District Election Officer, Maria CT. Zuali chuan a hmanpui a ni. He inelna ah hian Champhai District chhunga High School 10 telin First round (Mizoram leh India ram election chungchang leh Indian Polity) leh Second Round (Current Affairs leh General Knowledge) chu zawhfel a ni a, Venglai Secondary School, Holy Cross High School, Bethel Mission School leh Holy Mission School-ten Final lutin tunkar Zirtawpni khian Final Round neih leh a ni ang.


CADC-ah Chairman thlang

Chakma Autonomous District Council-a Budget Session hnuhnung berah Chairman dinglai H. Amaresh Chakma chu thlawptu a ngah tawkloh avanga paihthlak a nih hnuah nimin khan CADC Chairman thar atan MNF MDC, Mohan Chakma chu chuhtu awm lovin thlantlin a ni a, CADC-a Chairman thlanna atan hian niminpiah thleng khan hming pekluhna hun hawn niin Parva MDC Bial atanga thlantlin Mohan Chakma chiah hian chuh turin hming a pelut a ni.


Hri laka hmalak dan tur rel

Nimin khan Lawngtlai-ah District Bawrh-sap, Dr. Andrew H. Vanlaldika hovin District Level Task Force on COVID-19 chu thukhawmin COVID-19 hri leng lo hluar thar leh chungchang a hmalak chhunzawm zel dan tur an sawiho a. Lawngtlai District-ah hian Feb. 28 khan hri kai an enkawl te enkawl dam kim an nih hnuah April 9 khan hri kai an nei thar leh a, tun dinhmunah hri kai enkawl 51 an awm mek a. Lawngtlai District chhunga COVID-19 positive-te hi IR CCC, Thingkah-ah mi 48 leh Chawngte CCC-ah mi 3 dah an ni.


Hmalak dan tur sawihona nei

Nimin khan Hnahthial-ah District Level Task Force on COVID-19 chu Hnahthial-a VLTF te nen District Bawrhsap, H. Dolianbuaia hovin an thukhawm a, he hunah hian Bawrhsap chuan tun dinhmunah Hnahthial District-ah Covid-19 hri kai an awmloh thu sawiin, “Kan him zelna tur hian sawrkar thupek te kan zawm that a ngai a, hri kan kai theihna tur nia lang te pawh kan chhut chah zel a tulin thuawihlo te chungah pawh hremna kan lek kawh ngam tur a ni,” a ti bawk. Hnahthial District-ah hian RT-PCR hmangin mi 248, TrueNat Laboratory-ah mi 1190 leh Rapid Antigen Test hmangin Sample 803 enfiah a ni tawh a, heng atang hian hri kai 23 hmuh niin enkawl dam vek an ni tawh thung a ni.


GAD-ah SAD chhunluh Larsap in pawmpui

Mizoram sawrkar Council of Ministers-in General Administration Department-a Secretariat Administration Department chhunluh a pawm chu Mizoram Larsap chuan pawmpui felin, GAD hnuaia Wing pakhat, ‘Secretariat Administration Wing’ tih a ni tawh dawn a. April 19, 2021-a General Administration Department thuchhuak chuan, Secretariat Administration Department nena chhunfin a nih tak thu leh Secretariat Administration Wing (SAW) tia thlak a nih tak tur thu hi a tarlang a. Hetihrual hian GAD-a chhunluh a nih hmaa SAD inrelbawlna hrang ang zawng zawng chu a hrang zelin a la kal zui dawn tih a tarlang bawk.

Hetianga Department chhunfin a nih tak ah chuan anmahni chhunga inrelbawlna leh a kalphung tur te, Mizoram (Allocation of Business Rules) 2019 leh a dangte chu ennawn a, la siamrem chhoh zel tur a ni tih tarlan a ni bawk.

Comments

Chhiar Hlawhte