Mizoram-ah hri kai hmuhchhuah tlahniam hret

Niminpiah khan Mizoram-ah Sample 3200 enfiah niin hri kai mi 62 hmuhchhuah an ni a, a hma ni aiin hri kai hmuhchhuah zat an tlahniam leh hret a ni.

Niminpiah-a hri kai hmuhchhuah tam ber te hi Rapid Antigen Test hmanga Sample enfiah te atanga hmuhchhuah niin RAgT hmang hian Sample 2572 enfiah niin hri kai 53 zet hmuhchhuah an ni a, Lengpui Airport Screening Point-a Mizoram a rawn lut tur enfiah atangin hri kai 29 hmuhchhuah niin Aizawl District chhung hmun dangah hri kai 12 hmuhchhuah an ni bawk a. Lawngtlai District-ah hri kai 9 zet hmuh ni bawkin Lunglei, Serchhip leh Mamit District-ah hri kai pakhat theuh hmuh an ni bawk.

Niminpiah khan ZMC Laboratory-ah Sample 557 enfiah niin hri kai mi mi 3 hmuhchhuah an ni a, an zinga pahnih te hi hri kai nen lo inkawmhnaihna an neih avanga inkhunghrang lai niin midang pakhat hi State pawn atanga rawn lut, inkhunghrang lai a ni bawk. District hrang hranga TrueNat Laboratory-ah niminpiah khan Sample 71 enfiah niin hri kai mi 6 hmuhchhuah an ni bawk a, heng te hi Lunglei District-ah mi 4 bakah Serchhip leh Siaha District-ah mi pakhat ve ve te an ni.

Nimin khan Mizoram-ah COVID-19 hri kai mi 5 te chu hri lakah fihlimin enkawl dam leh an ni a, heti hian nimin tlai dar 5:00 thleng khan Mizoram-a hri kai hmuhchhuah chu 5220 ni tawhin hri kai hmuhchhuah atang hian mi 4605 te chu enkawl dam an ni tawh a, hei hi hri kai hmuh tawh zawng zawng atanga chhutin zaa 88.21 niin hri kai enkawllai 603 an la awm a, nunna chan mi 12 an awm tawh bawk a ni. 

Mizoram District hrang hrang zingah Aizawl District chu hri kai enkawllai tamna ber niin mi 456 enkawl mek an la ni a, Lawngtlai District-ah mi 58 enkawl mek niin Lunglei District-ah mi 33 enkawl an la ni bawk a. Kolasib District-ah mi 25 enkawl niin Serchhip District-ah mi 17 enkawl an la awm a, Champhai District-ah mi 6 enkawl an la nih bakah Mamit District-ah mi 4 leh Siaha leh Saitual District-ah mi 2 ve ve enkawl an la ni a, Khawzawl leh Hnahthial District-ah hri kai enkawllai an awmlo a ni.

India ramah COVID-19 hri kai an pun belh zel :

Darkar 24 kalta chhung khan India ramah COVID-19 hri kai mi 3,32,730 hmuh belh leh niin India rama hri kai hmuhchhuah zawng zawng chu 1,62,63,695 an tling ta a, hei hi Sample enfiah tawh zawng zawng 27,44,45,653 atangin zaa 5.93 a ni. India rama hri kai zingah hian 1,36,48,159 te chu enkawl dam ni tawhin hei hi hri kai hmuh atanga chhutin zaa 83.92 a ni a, nunna chan 1,86,920 awm tawhin enkawllai 24,28,616 an la awm mek a ni.