Mizoram-a lut tur tan Screening Point siam belh tum

Serlui bialtu MLA, Lalrinsanga Ralte chuan nimin khan Vairengte-a Screening Point chu tlawhin COVID-19 thawh hnihna lo thleng leh-a Vairengte Screening Point-a duty te mamawh leh inbuatsaih dan te a enpui.

Rubber & Allied Crops Development Board Vice Chairman ni bawk, Lalrinsanga Ralte hi Vairengte Forest IB-ah Vairengte SDO (Civil) leh sawrkar hotute bakah tlawmngai pawl te chu kawmin Vairengte Screening Point chu Rapid Antigen Test Negative Certificate lem hmanga kaltlang leh Certificate nei lova kaltlang an awm thin nia Social Media lam a thu thehdarh awm thin chungchangte sawiho a ni a, Serlui bialtu MLA chuan Chief Minister leh Health Minister ten hrileng avanga Zoram mipuite'n kan nitin mamawh lakluhna kawngah harsatna kan tawh lohna turin Vairengte chauh ni lo, Saiphai leh Phaisen-ah Screening Point te dah turin ruahmanna siam mek a nih thu a sawi bawk.

Serlui bialtu MLA chuan nimin atang khan Phaisen Screening Point chu kalpui tur a nih thu leh Saiphai Screening Point pawh ni hnih khat hnu a kalpui theih mai tur a buatsaih a ni tih a sawi a, Saiphai leh Phaisen Screening Point a thawk tur Lab. Technician leh Helper te pawh dah turin Health Department lam pawh an inbuatsaih mek tih a sawi bawk.