Latest News

Chanchin thar thenkhat :

PM in Mizoram CM rawn bia

Mizoram hmun tam taka kangmei chhuak chungchangah nimin khan Prime Minister, Na-rendra Modi chuan Mizoram Chief Minister, Zoramthanga chu Telephone hmanga rawn bia in Central Sawrkarin Mizoram mipuite a tawrhpui thu leh Central lam atanga tanpui theihna tur awm kawng hrang hrangah inthlahrung lova hrilh hre thuai turin a chah a. Chief Minister chuan kangmei chhuah chhan lian ber pakhata lang chu khaw khen vang a nih thu sawiin, kumdanga ruahtui kan dawn thin ang kan dawn tak loh chuan Thal khawro a siam a, kangmei a chhuah awlsam phah niin a lang, a ti a. Indian Air Force-in an rawn puihna ah lawmthu sawiin, kangmei chuan ziaawm lam a pan thu leh, Mizo mipui leh sawrkar in theih-tawp kan chhuah tlan vang a nih thu a sawi bawk.


Kangmei chhuak tam tawh

Nikum November thla atanga nimin thleng khan Mizoram-ah ramkang tum 2523 awm anga chhinchhiah niin heng ah hian Hectare 5202.20 a zau ram a kang nia chhut a ni. Mizoram sawr-kar-a Environment, Forest and Climate Change Department hnuaia DFO hrang hrang 9 leh MADC in an chhinchhiahna khaikhawmna atanga a lan danin nikum November thla atanga nimin thleng khan Mizoram hmun hrang hrangah kangmei tum 2523 chhuak anga chhinchhiah niin heng ah hian ram hectare 5202.20 kang anga chhut a ni a, DFO Area hrang hrang zingah Mamit DFO huamchhungah kangmei chhuak chhinchhiah tam berin tum 376 chhinchhiah a ni a, Kolasib DFO Area in dawtin tum 338 chhinchhiah a ni bawk a, Thenzawl DFO Area in dawtin tum 321 chhinchhiah a ni bawk a, heng pathum hi tum za thum aia tam kangmei chhuak chhinchhiah te an ni.


A thlawnin Oxygen thun dawn

COVID-19 hri leng mekah ZMC-SRHF a Oxygen mamawh te chu F. Kapsanga, Tuikual te chhungin May thla chhung atan a thlawnin an thun sak dawn a, anni hian Zuangtui-a Oxygen siamna hmun hi an nei a ni.


AMC Mayor hnenah thlen

Aizawl Municipal Corporation (AMC)-a ZPM Councillor te chuan nimin khan AMC Mayor, Lalrinenga Sailo chu a Office-ah hmuin hri leng mek chungchanga hmalakna tur thil tul te an thlen. ZPM Councillor te hian COVID-19 Second Wave leng mekah, boruak atanga inkai-chhawn theih a nih thu hriat a nih tak bawk avangin, AMC Act 2015 tlawhchhanin, Extra-Ordinary Meeting hnuaia Requisitioned Meeting ko a, Aizawl khawpui kawtthler tin Fire service motor a kah thianghlim/disinfect chungchang sawiho tura inhmuhkhawm ko turin an thlen a ni.

Hei bakah hian, Board of Councillors Meeting March 26, 2021, ni hnihna in a rel angin, Emergency Pool Fund hman dan tura inkaihhruaina dan (guidelines) a rang lama siam tura thlenin, Emergency Pool Fund hmang hian, veng pathum a LLTF te hnenah tanpuina pek chhuah a ni tawh a. AMC Mayor chuan heng te hi a rang lama ngaihtuah a nih tur thu a lo hrilh a ni.


Chamring lei khichat enfiah

Tunhnaia Chamring khua-a lei khichat chu nimin khan bialtu MLA, Prof. F. Lalnunmawia hovin DM&R Department, Geology & Mining Department, PWD leh Information & Public Relations Department aiawh ten a hmunah tlawhin an enfiah a, Senior Geologist P.Sanghnuna chuan lei khichat lo thlen chhan hi lung pial tlep bulthut pheh (toe cutting of deep slope) vang a ni tih sawiin, tuna a khik chahna atanga chhaklam metre 40 vela hla-ah a chet tawhna hnu hma anga lang, ruam (depression) a lo awm tawh tih a sawi. He leikhi a zau lai berah ft. 11 niin In neitute chu zan lamah an In-a riak lo tura tih an ni bawk.


MPCC leh BJP in ngen

Thla thar May 1 atanga kum 18 chunglam te hnena COVID-19 Vaccine pek turah sawrkar laipui in vaccine man a tum vek tawh dawn loh avangin State sawrkarin engemawzat a tum ve a ngai tawh dawn tih MPCC chuan thuchhuah siama tarlangin, Mizoram-a kum 18-45 inkarte hnena a thlawna COVID-19 vaccine pe tura MNF sawrkar an phut thu an sawi bawk. BJP Mizoram Pradesh pawhin kum 18 chunglam te tana Covid Vaccine man chawia pek tum ani chu hriatthiam har an tih thu sawiin, man chawi lova pek dan ngaihtuah hram turin Mi-zoram sawrkar an ngen bawk.

Comments

Chhiar Hlawhte