K. Sapdanga’n Lalduhoma hmabak thawh chhunzawm phalsak turin Bial mipui khawngaih a dil

ZPM President mawhphurhna la mektu K. Sapdanga chuan kum 5 chhung atana Serchhip bialtu MLA atana thlantlin tawh Lalduhoma chu a hmabak laklawh tak takte thawh chhunzawm phalsak turin Serchhip bial mipuite khawngaihna a dil.

Nimin chawhnu khan Serchhip Press Club-ah thuthar thehdarhtute kawmin ZPM Vice President leh President mawhphurhna la mektu K. Sapdanga chuan Serchhip bial-a Assembly bye-election neih tur chu bye-election lo awm tawhte nen a inang lo viau tih sawiin, “Bye-election dangah kha chuan Ruling party hian huhang, (incumbency wave) chak tak a nei thin a, eptu party dangte hian han chuh ve bawk mah se, Ruling Party hi an papek deuh thin. Tun tum bye-election ah hi chuan Ruling party leh eptu party inepna ang zawngin boruak a kal mang hauh lo a, bye-election buatsaih a ngaih chhan, bialtu MLA Pu Lalduhoma kutthlak a nih dan kha Mizoram Political Party-te inkara kut inthlak dan atan chin zui zel tha ti leh ti lo azawngin boruak a kal a, Ruling party nih leh nih loh emaw, Unit leh Block neih that leh that loh emaw hian kori a tu mang hauh lo,” a ti a. “Hei vang hian inthlan hun danga 'last minute' kawngro su em em thin pawh kha tun inthlanah hi chuan a hman hleih theih loh a ni ang, tun thlengin Khiangkawi Ipte ak-a chibai sem hmel hmuh tur pawh an la awm meuh lo,” a ti.

ZPM Vice President chuan Serchhip bialtu MLA atana thlan tawh Lalduhoma’n kum khat leh a chanve vel chauh MLA a nih chhunga MLA Fund hmanga bial chhunga hna a thawh chu hawina lam apiangah hmuh tur a awm tih sawiin, “Serchhip bial hi MLA Fund hmang tha ber, hmang daihzai ber zinga chhiar ngam a ni,” a ti a, “Heng hmasawnna hna te hi ZPM chauh chhawr chi pakhat mah a awm lo. A thawktu hi opposition MLA a ni ngei mai, a chhawrtu, tuk zana zawhtute erawh chu Ruling mi te, pawl dang mi te, neutral te an ni,” tiin hei hi ZPM ten an aupui, Kalphung thar, mipui sawrkar an tih chu a nih thu a sawi bawk.

K. Sapdanga chuan MPF leh Political Party-te thuthlung venghim tura an thawhrimna vanga inthlan boruak thianghlim tak kan nei thei dawn a nih hmel tih pawh sawiin, lawmawm a tih thu leh MPF-ten theihtawp an chhuah chu lawmawm a tih thu a sawi a. Serchhip bial-a bye-election neih turah pawl tin ten Candidate an nei tha tlang hlawm hle tih sawiin, “Kum nga atana kan lo thlantlin kan MLA Pu Lalduhoma khan, kum khat leh a chanve chhung leka bial hmasawnna hna a lo thawh tawh te hi mipuiten khawngaiha min hmuhsak turin kan ngen a, a hmabak laklawh tak takte hi thawh chhunzawm phalsak turin, Serchhip bial mipuite khawngaihna kan rawn dil tak meuh a ni,” a ti.