ZPM Party in MNF Video Advertisement chu MCC bawhchhiatna ni ngeia an hriat thu an sawi

Tunhnaia MNF Party-in Serchhip Bye-Election atana Video Advertisement an siam pakhat a an thu tarlan te chu ZPM chuan Model Code of Conduct (MCC) bawhchhiatna a nih thu sawiin, MNF Party in an thehdarh zui zel a nih chuan a tul anga hma an lak zui tur thu an sawi.

Nimin chawhma lam khan ZPM Party General Hqrs. a PAC Member, TBC. Lalvenchhunga chuan Serchhip Press Club-a thuthar thehdarhtute kawmin MNF Party-in Serchhip Bye-Election atana Video Advertisement an siam zingah Govt. Serchhip College zirlai naupangin sawrkar leh MNF Official Candidate, Vanlalzawma hmalaknaa College zirtirtute leh zirlaite an lawm takzet avangin Serchhip hmasawn zelna tura MNF Official Candidate vote tura a ngenna Video-ah zirlai naupang hian Public Property-ah Party Candidate mal tan vote dilin an College zirtirtu leh zirlaite aiawhin an lawm takzet tih a sawi niin a sawi a.

Hei hi ngun taka ngaihthlak chuan sawrkar College-ah sawrkar hnathawk ten party tihbik neiin Public Property chu vote dilna atan an hmang a tih theih tih sawiin, ECI-in Election Model Code of Conduct (MCC) a duan chu a bawhchhe ngei nia an hriat thu a sawi a. Serchhip bial-ah in hekna avanga bye-election neih a nih dawn laia hemi chungchang Official-a Complain thehluh erawh an hruaitu ten tha an tihloh thu sawiin, hetiang ti tur hian College thuneitute hnen atanga phalna an lak an hriat loh thu a sawi a. Hetianga an thil thehdarh hi complain thehluh tum lo mah se MNF party chuan chapona atana hmanga an tilui zel a nih chuan Dan anga kala hma an lak zui tur thu a sawi bawk.

He Video Clip-a Vanlalzawma ngenna zara Mizoram sawrkar in NEC atangin Govt. Serchhip College Administrative Building sakna tur cheng nuai 1095 hnuhchhuah dawn anga sawi chung chang ah TBC. Lalvenchhunga chuan Planning Department Note Sheet, March 24, 2021-a a lan danin Planning & Programme Implementation Department, Govt. of Mizoram hian H&TE Department DPR chu March ni 23, 2021-ah NEC-ah submit a nih thu a tarlang a. Model Code of Conduct (MCC) in March 16, 2021 atangin sawrkar hmalakna te puanzar a khap laiin advertisement hmang meuha an puangzar chu dan bawhchhiatna ni ngeia a lan thu a sawi a. Vanlalzawma ngenna avangin College-ah Asst. Professors, regular post 4 lai pek an nih thu a sawi pawh Oct. 25, 2019-ah Asst. Professor post ruak 17 hnawhkhat turin MPSC kaltlangin advertisement chhuah a nih tawh thu leh January 29, 2021-ah Interview atangin mi 17 te chu thlan niin Reserved-ah mi 32 dah an ni tih a sawi a. MNF in Candidate tur an puan hma daih a thil thleng tawh a nih thu a sawi bawk.