Latest News

Serchhip DEO in MPF leh Political Party aiawhte inthlanpui-a thawhhopui-ah a sawm

Serchhip District Election Officer, Kumar Abhishek chuan Serchhip bial-a Assembly bye-election neih tur chungchangah nimin khan Mizoram Peoples Forum (MPF) Serchhip District hruaitute a kawm.

Serchhip DC Meeting Hall-a MPF Serchhip District hruaitute a kawmna hunah hian District Election Officer leh District Bawrhsap, Kumar Abhishek chuan Mizoram-a hna a thawh chhungin tun bye-election hi inthlan tum li a buaipuina a nih tawh thu sawiin, chung inthlan kalpui tawh zawng zawngah chuan MPF ten tha takin inthlanna buaipuitute an tanpui thin tih a taka a hmuh thu a sawi a. Tun tuma bye-election kan hmachhawn mekah pawh MPF te thawhpuina an beisei thu sawiin, chutiang atana thawhpui-ah chuan a sawm bawk a. Model Code of Conduct bawhchhiatna thleng an hriat chuan rang taka hrilh hre thin turin a chah bawk. 

He hunah hian Serchhip bial bye-election neih tura General Observer, Lokesh Kumar IAS pawhin khua leh tui tupawhin election laia dan bawhchhiatna an hmuhte cVIGIL application hmanga an report reng theih thu a sawi a. MPF hruaitute leh an member zawng zawngte, cVIGIL app hmang uar tur leh inhrilhdarh turin a ngen bawk.

He inkawmna ah hian MPF Serchhip District te hi an President, Rev. Zohmunmawia chuan a ho a, an Secretary R. Sanghmingthanga chuan an hmalak tawhna leh  hmalak an tum dan tlangpuite a tarlang a. Vote thlak ni-a mawh an lo lak ve tur hrang hrang te pawh sawilan niin, chuta duty turte chu training pek hmasak nise an ti a. District Election Officer Kumar Abhishek chuan MPF Local Forum tinte chu Vote thlak ni-ah an lo inenkawl ve nan Rs. 500/- theuh pek an nih tur thu a sawi bawk.

Nimin vek khan District Election Officer hian DC Meeting Hall-ah Political Party hrang hrang aiawhte kawmin inthlanna neih tur chungchang a sawipui bawk a, he hunah hian Kumar Abhishek chuan inthlanna felfai tak buatsaih a nih theih nan Political Party hrang hrang aiawhte thawhpuiah sawmin, Election Commission of India in inkaihhruaina dan a siam hrang hrangte tha taka zawm tum theuh turin a chah a, thil diklo hmuh leh hriat an neihte a rang thei ang bera hrilh hre thin tura ngenin, rang taka hma an lak zui theih nan a rang lama inhrilhhriat zel tha a tih thu a sawi a. Inthlan kaihhnawih-a Forms leh lehkha pawimawh mamawh an neih apiang District Election Office-ah an tan a thlawna lak theihin a awm reng tih hrilhin, inthlanpui neih tur atan duhsakna a hlan a ni.

He hunah hian Political Party ten Campaign lai te, Vote thlak ni te, Vote chhiar ni te-a an tih ngei ngei tur thil pawimawh hrang hrangte chipchiar taka tarlan niin MCC & Expenditure Monitoring-a Nodal Officer, Malsawmtluanga leh Election Officer, Vanlalhmachhuana ten heng Political Party te lo tih ve tur thil pawimawh hrang hrangte hi an hrilhfiah a ni.

Comments

Chhiar Hlawhte