Hri kai mi 3 hmuh belh leh

Niminpiah-a Chhingchhip-a Sample enfiah atangin COVID-19 hri kai mi pathum hmuh an ni a, Serchhip District-ah COVID-19 hri kai enkawllai mi 13 an awm mek a ni.

Niminpiah-a Chhingchhip atanga COVID-19 hri kai hmuhchhuah zinga pakhat hi Chhingchhip Mualpui mi niin hri kai nen inkawmhnaihna nei an ni a, midang pakhat chu Chhingchhip Mualpui ami bawk niin tun thla ni 12-a Ahmedabad atanga lo haw, RT-PCR test negative certificate rawn nei, Lengpui Airport Screening Point-a Rapid Antigen Test Negative bawk niin hri kai lan-chhuahna a neih avanga Sample enfiah a nih hnua hri kai tih hmuhchhuah a ni a, midang pakhat hi Sainik School-a thawk, hri kai nen inkawmhnaihna nei a ni bawk.

Nimin khan Serchhip District-a True-Nat Laboratory-ah Sample 5 enfiah niin Rapid Antigen Test hmangin Sample 20 enfiah a ni bawk a, heng atang hian hri kai hmuhchhuah thar an awmlo thung a ni.

Heti hian nimin thleng khan Serchhip District-a hri kai hmuhchhuah chu 194 an ni ta a, an zinga 180 te chu enkawl dam ni tawhin hri kai enkawllai mi 13 an la awm mek a, hri kai zingah nunna chan mi pakhat a awm tawh bawk.