Serchhip District-ah ‘Earth Day’ hman a ni

Nimin April 22 khan khawvel pumah ‘Earth Day, 2021’ hman a ni a, Serchhip District chhungah pawh DFO Thenzawl hmalakna in he ni pual hian Forest Range hrang hrangah hun hman a ni.

Thenzawl DFO Office tual-a he ni puala inkhawm tawi neih ah Thenzawl DFO, Margareth Lalramchhani chuan, “Kan sik leh sa in mumal a neilo chho tial tial a, Thal chhuang a rei tial tialin khua a lum tial tial a, hei mai bakah ruah sur hunbi pawh a buai tial tial a, kan lui hnar te a kang chat mek bawk a. Hetianga kan kal zel chuan reilote ah kan ram hian Tui lamah harsatna namen lo kan tawk ngei dawn,” a ti a. Chumi lo thleng tur veng tur leh a siamthat ngai lai siamtha turin an Department chuan theihtawp chhuaha hma an lak a ngai tih sawiin, “Kumin Fur lo thleng turah hian, kan theih ang angin thing a tam thei ang ber phun tur leh thiangtiak semchhuak turin inpuahchah ang u,” a ti.

Thenzawl DFO chuan COVID-19 hri leng avanga vah chhuah a rem loh pawh in Mobile Phone hmangin thu tam tak an puangzar thei tih pawh sawiin, “Hei te hi hmang tangkai thiam ila. Kan ram hi kan ta a ni a, kan siamthat leh kan tan, a thatloh leh kan tawrh tur a ni,” tiin kumin-a he Ni thupui, ‘Restore the Earth’ tih in a sawi anga kan khawvel siamtha leh tura theihtawp chhuaha hma la thar turin he huna tel te chu a sawm bawk.

‘Earth Day’ hi kum 1970 atang khan khawvel pumah hman thin niin kan chhehvel-a thilnung chi hrang hrang humhalh leh venhimna kawngah mipui kan thanharh theihna tura hmalakna a ni a, kumtin thupui hrang hrang neiin hman thin a ni a, kumin hian he Ni pual hian hmun hrang hrangah thuziak te an tar a ni.