Latest News

Mizoram-ah May 3, 2021 thleng hri leng vanga inkhuahkhirhna kalpui chhunzawm a ni dawn

Mizoram-ah hri leng a hluar avanga inkhuahkhirhna khauh zawk kalpui mek chu May 3, 2021 zing dar 4:00 thleng kalpui chhunzawm tura tih a ni a, inkaihhruaina thenkhat pawh tih danglam hret a ni.

Mizoram chhunga COVID-19 kai thar chak taka an pun avanga Mizoram chhunga hman tur inkaihhruaina hman lai, tukin dar 4:00-a tawp tur chu her danglam hretin May 3, 2021 zing dar 4:00 thleng kalpui chhunzawm tura ruahman a ni a, Mipui vantlang tana hriat tur tarlan thar ah AMC Area leh District Hqrs. ah te chuan inkhuahkhirhna hun chhung hian tumahin mahni In leh compound an chhuahsan tur a ni lova tul bik thil vanga chhuah ngai - damdawi lei tur, nitin mamawh lei tur leh inentir turte chuan an awmna VLTF/LLTF te phalna an la hmasa tur a ni a, nitin mamawh lei turte hian mahni awmna Veng VLTF/LLTF te ruahmanna zawm ngei tur a ni ang. Hemi hun chhung hian lirthei veivah khap tlat a ni dawn a, hei hian sawrkar in phalna a pek bik te erawh a huam dawnlo a. Sawrkar hnathawk leh sawrkar sum atanga hlawh la te chu COVID-19 duty turin a tulna apiangah hman an ni ang.

Public Park, Picnic Spot, Movie Theatre, Gym, Community Hall, Restaurant, Shopping Complex, Mall leh Intawllenna hmun zawng zawng chu khar chunzawm tur a ni a, Zirna In leh Sakhaw biakna hmun te chu khar chhunzawm tur a ni bawk ang. Board Exam, All India Level Exam te leh Recruitment Exam kal lai mek te erawh chu phalsak an ni a. SoP tha taka zawm tur a ni a, Exam huaihawttu ten mawh an phur ang. State Sawrkar hnuaia Exam ruahmanna lo awm tawh la tan lohte chu sawn hlat (postpone) tur a ni ang.

Inneihna leh reception-ah mi 30 aia tam punkhawm phal a ni lova, Mitthi vuina ah mi 30 aia tam punkhawm phal a ni lo bawk. Mipui punkhawmna – Birthday leh Anniversary lawmna, Games & Sports, Book Release, Lungphun leh intihhlimna ang chi reng reng te chu he hun chhung hian huaihawt phal a ni lova, Chhiatni/thatni puipunna-ah ei leh in sem/siam phal a ni lo bawk.

Mizoram chhungah zin veivah phal a ni a, zin turte chuan an chhuah tanna veng VLTF/LLTF te lehkha kengin an zin veivak thei anga. Chu lehkha-ah chuan an kal tanna (Origin) leh zinna/kalna tur hmun (destination), ni leh darkar te a chuang tur a ni thung ang. State pawn atanga bungraw lakluh nan phalna hranpa lak ngai lovin lakluh theih a ni anga, amaherawhchu, mCOVID-19 ah an in-register vek tur a ni a. Bungraw lakluh phurtute (driver leh handyman) reng reng Entry Point-ah uluk takin Screening kalpui chhunzawm a ni anga, State pawn atanga bungraw lakluh phurtute (driver leh handyman) te chu an kalphung pangngai angin khaw dâiah anmahniin eirawng an inbawl chawp ang a, khawchhungah midang nen inchiahpiah lovin an bungrua an unload zawh veleh an let leh nghal ang.

Comments

Chhiar Hlawhte