Mizoram CEO in Serchhip bial tlawhin inthlanna neih tur atana inbuatsaihna a enpui

Mizoram Chief Electoral Officer (CEO), P. Jawahar IAS chuan Inrinni khan Serchhip Bial chhung rawn tlawhin tun thla ni 17-a Assembly bye-election neih tur atana inbuatsaihna hrang hrang a enpui bakah Election Nodal Officers te nen inkawmna an nei bawk.

Mizoram CEO hian Ningani chawhma lamah 26-Serchhip (ST) A/C chhunga Rural Area Polling Station awmchhun pahnih, Neihloh leh Buangpui Polling Station te tlawhin inthlanna felfai a awm theih nan an inbuatsaih dan a en a, heng khaw pahnih-a inbuatsaihna te chu tha a tih thu leh lungawithlak a tih thu a sawi a ni. Neihloh leh Buangpuite a tlawh zawh hian Serchhip panin Serchhip DC Meeting Hall-ah Election inbuatsaihna kal zela Nodal Officers te nen Meeting an nei zui leh a ni.

He Meeting-ah hian Mizoram CEO, P. Jawahar chuan tun thlenga Serchhip District Election Officer leh a hnuaia peng hrang hrangte inbuatsaihna chu tha tawk hle-a a hriat thu sawiin, hmabak thawh tur la awm apiangte pawh felfai taka an kalpui zel ngei a beisei tih a sawi a. Inthlanna a zawhfel vek hma chu tumah an inthlahdah a thiang rihlo tihsawiin, Inthlanna thianghlim leh felfai nei tur chuan Election Team hrang hrang leh Officer thawktute inpawhna tha neih a tul thu leh, kawng khata thil fello a lo thlen palhin chu chuan thildang a kangkai thei zel tih hre chungin kil hrang hranga hmalakna te inhrepawh tawn chunga hma an lak zel a pawimawh thu a sawi a. Election Commission of India inkaihhruaina te chu an kal dan tur a ni tih hrerengin Officer ten an mawhphurhna te hriatchian a pawimawh thu sawiin, chu chu hre reng turin Nodal Officer te hi a chah a. District Election Office, Chief Electoral Office leh Election Commission of India Office te inthlunzawmna tha tak an neih reng a pawimawh thu a sawi bawk a. “In inbuatsaihna a tha tawk tih ka mit-in a hmu a, tluang takin he inthlanna hi in kalpui thei ang tih ring chungin duhsakna ka hlan cheu a ni,” a ti.

He hunah hian Serchhip District Bawrh-sap leh he inthlanna a Returning Officer tur, Kumar Abhishek IAS chuan inthlanna atana inbuat-saihna enpui tura Mizoram Chief Electoral Officer in Serchhip bial a rawn tlawh chu lawmawm a tih thu a sawi a, inbuatsaihna chu Election puan a nih hma tawh atangin a theih ang angin bul an lo tan tawh tih sawiin, tun thlenga kalpui tawh chin leh hmabak la awm te a sawifiah bawk. He inthlanna neih tura General Observer, Lokesh Kumar IAS leh Expenditure Observer, Laxmi Kanth IRS te pawhin thusawina hun hmangin, thil pawimawh hrang hrang sawihona neih a ni bawk.