Mizoram-ah hri kai 7 hmuh belh; nunna chan 1 awm

Pathianni khan Mizoram-ah Sample 520 enfiah niin heng atang hian COVID-19 hri kai mi 7 hmuhchhuah leh an ni a, hetihlai hian hri kai hmuhchhuah zingah Pathianni zan khan nunna chan an awm belh leh thung.

Pathianni-a Mizoram-a COVID-19 hri kai hmuhchhuah te hi Rapid Antigen Test hmanga Sample enfiah 452 te atanga hmuhchhuah vek niin an zinga 5 te hi hri kai hmuhchhuah tawh te nen inkawmhnaih atanga hri hi kaichhawng niin an lang a, midang pakhat hi tunhnaia State pawn atanga rawn lut niin midang pakhat hi hri a kaina hriatloh a ni thung. Pathianni khan ZMC Laboratory-ah Sample 48 enfiah niin District hrang hranga TrueNat Laboratory-ah Sample 20 enfiah a ni bawk a, heng atang hian hri kai hmuhchhuah an awmlo thung a ni.

Hetihlai hian Mizoram-a COVID-19 hri kai hmuhchhuah zingah nunna chan awm lehin Pathianni zan khan R. Lalmuanzova (34) , Kanan Veng Aizawl chu State Referral Hospital, ZMC-ah a boral a, R. Lalmuan-zova te chhungkua hian tunhnai khan COVID-19 hri hi kaiin a pa pawh ZMC-ah enkawl mek niin a nu leh a farnu te pawh BSUP, Durtlang-ah enkawl mek an ni bawk a, amah hi tun thla ni 10 khan ZMC-ah inentirin Rapid Antigen Test hmanga a Sample enfiah ah hri a kai tih hmuhchhuah niin ni 2 hnuah a boral zui ta a ni. Nimin vek khan Kanan Koh-hran Hall-ah vui nghal a ni.

Nimin khan Mizoram-ah COVID-19 hri kai mi 4, Aizawl-ah mi 3 leh Champhai-ah mi pakhat te chu hri lakah fihlimin anmahni enkawlna hmun atanga chhuahtir leh an ni a, heti hian nimin tlai dar 5:00 thleng khan Mizoram-a hri kai hmuhchhuah tawh chu 4619 an tling tawh a, hri kai hmuhchhuah atanga mi 4468 te chu enkawl dam ni tawhin hei hi hri kai hmuhchhuah atangin zaa 96.73 a ni a, hri kai enkawllai 139 la awmin nunna chan mi 12 an awm ta a ni.