Latest News

Cricket Final khel dawn

Cricket Association of Serchhip District in an buatsaih, Serchhip District Cricket League vawi khatna chu Vawiin chhun dar 12:00 hian Final khelh a ni dawn ta a, Tuikhuah Veng CC leh AO3C ten Final hi an khel dawn a ni. He inkhel hi TV lamah en theih tura pekchhuah leh a ni dawn a ni. Vawiin a Final khelh hi Cricket Association of Mizoram hotute pawhin an rawn hmanpui dawn a ni.

Health Minister hovin AMC Councillor leh Local Council ten hri laka himna tur an sawiho

Nimin khan Health Minister, Dr. R. Lalthangliana hovin Aizawl Municipal Corporation (AMC) Councillor te leh Aizawl City Area Local Council hotuten COVID-19 laka Aizawl khawpui a him theihna tura hmalak ho dan tur hrang hrang an sawiho.

He sawihona DHME Conference Hall, Aizawl-a neih ah hian Health Minister chuan tuna Mizoram in COVID-19 hri vei mek (active case) kan neih 985 zinga 738 (75%) chu Aizawl khawpui chhung ami te an ni tih sawiin, COVID-19 hrik inkaichhawn a awlsam tawh hle nia a lan bakah hri kai kan neih te pawh a hma ai khan an dam chaklo sawt ta hle nia a lan thu a sawi a, kan hmalam hun thlir thiam a har tawh em avangin nasa lehzuala tan kan lak a ngai tih sawiin, Aizawl khawpui enkawl tura mipuiten an thlanchhuah Councillor te leh Local Council hotute nen kan dinhmun diktak hmaichhana sawiho chu a tul thu a sawi a. “Kan khawpui venghim tura mawhphurhna pawimawh tak chelhtute in nih avangin theihtawp chhuah tak meuha tan kan lak tlan a ngai a ni,” a ti.

He hunah hian Medical Operational Team Chairman Dr. ZR Thiamsanga MLA pawhin Mizoram chu COVID-19 bei tura tha leh zung zawng zawng senga kan tan mar a ngaih lehzual hle thu sawiin, “CCC leh Quarantine Centre te a khat chak em em mai a, positive te kan pun chak bakah symptom nei an tam sawt em em a, heng te avang hian Community Quarantine Centre leh Community Covid Care Centre (CCCC) pawh siam belh lehzel a la tul dawn niin a lang a, hengah pawh hian Councillor ten an bial chhunga hmalaknaah theihtawp chhuaha min lo tanpui a ngai a ni,” a ti a. MLA ten an thla khat hlawh atanga 10% chu COVID-19 do nan pek an remtih tawh thu a sawi bawk.

Aizawl Mayor, Lalrinenga Sailo pawhin Councillor ten an bial theuhah theihtawp chhuaha COVID-19 dona kawnga hma an lak thin thu sawiin, an thla khat hlawh chanve (50%) pawh COVID-19 dona atana tangkai taka hman turin an thawh dawn bakah, AMC hnuaia hnathawk, AMC Employees Welfare Association Member ten an ni khat hlawh theuh COVID-19 dona turin an thawh dawn tih a sawi a. Vaccine sem kawnga hmalakna puihbawm nan cheng nuai hnih AMC-in an pek tawh thu te, Aizawl-a CO-VID-19 hluarna Veng hrang hrang an tlawh thu leh heng Veng LLTF te tha tihchak nan Rs. 10,000/- theuh an pek thute a sawi bawk.

Aizawl City Area Local Council Association hruaitute pawhin Local Council member ten an thla khat hlawh theuh COVID-19 dona atan thawh turin ruahmanna an siam mek thu an sawi a, heng hi anmahni area theuha Local Task Force te tha tih chak nan hman an tum tih an sawi bawk a ni.

Health Minister chuan AMC Councillor leh hnathawktuten an hlawh atanga COVID-19 dona tura sum an thawh tur leh chutiang bawka Local Council ten ruahmanna an siam chu chhuanawm a tih thu leh entawntlak a tih thu sawiin, Aizawl khawpui himna tura an thahnemngaihna leh inpekna fakawm a tih thu a sawi a. Chief Minister pawh COVID-19 dona kawngah a inhawn thu sawiin, a hmalakna in COVID-19 hri kai te enkawlna damdawi vang tak, Remdesivir 1000 lai ZMC-a hman tur an lei theih dawn thu a sawi bawk.

He thutkhawm ah hian Aizawl Municipal Corporation hnuaia bawlhhlawh paih motor khalhtute harsatna tawhte sawi niin, COVID-19 dona kawnga an hnathawh that ah fakawm an tih thu sawi a ni a. COVID-19 hri leng laka an him theihna tura rawtna awmte chu tihhlawhtlinsak an nih tur thu Health Minister hian a sawi a. Hri leng dona kawnga AMC Councillor te rawtna pawh a theih anga bawhzui a nih tur thu a sawi bawk.

Comments

Chhiar Hlawhte