Mizoram-ah hri kai hmuhchhuah belh zel an ni

Mizoram-ah COVID-19 hri kai hmuhchhuah pung zelin niminpiah a Sample enfiah 678 atangin COVID-19 hri kai mi 5 zet hmuhchhuah leh an ni.

Niminpiah khan ZMC Laboratory-ah Sample 100 enfiah niin heng atang hian COVID-19 hri kai mi pahnih hmuh an ni a, Aizawl mi ve ve niin Private Hospital-a hri kai hmuhchhuah an ni a, pakhat hi taksa-a hri kai lanchhuahna nei a ni a, hri an kaina hriatloh a ni.

Niminpiah khan District hrang hranga TrueNat Laboratory-ah Sample 7 enfiah niin hri kai pakhat hmuh a ni a, tunhnaia Guwahati atanga rawn haw, Thlawhtheihna-a a chuanpui in hri a kai avanga Sample enfiah a nih leh hnua hri kai tih hmuhchhuah a ni a, taksa ah hri kai lanchhuahna a awm bawk a ni. Rapid Antigen Test hmangin niminpiah khan Sample 571 enfiah niin hri kai pahnih hmuh an ni leh bawk a, pakhat hi State pawn atanga rawn haw niin pakhat zawk hi damlo zai tur, thla khat chuang pawn chhuak lova awm niin hri a kaina hriat a ni lo bawk.

Heti hian nimin thleng khan Mizoram-a COVID-19 hri kai hmuh tawh chu 4473 an tling ta a, nimin khan Mizoram-a hri kai enkawl dam an awm belh lo thung. Heti hian nimin tlai dar 5:00 thlenga Mizoram-a hri kai enkawl dam chu 4434 niin hri kai hmuhchhuah atanga za zela 99.13 te chu enkawl dam an ni tawh a, tunah hian hri kai enkawllai 28 la awmin nunna chan mi 11 an awm tawh bawk a. Hri kai enkawllai 28 zinga 26 te hi Aizawl District-a enkawl niin Siaha leh Hnahthial District-ah hri kai pakhat ve ve enkawl an la ni bawk.