Latest News

Chanchin thar thenkhat :

COVID-19 chi thar la hmu lo

Health Minister, Dr. R. Lalthangliana chuan Mizoram-ah Covid-19 chi thar - UK Variant (B.1.1.7), South African Variant (B.1.351) leh Brazilian Variant (P.1)) vei hmuhchhuah a la ni lo tih a sawi a, Mizoram-a Covid-19 vei hmuh tawhte sample chu National Institute of Biomedical Genomics (NIBMG), West Bengal-ah thawn thin a nih thu sawiin, “Result kan dawn tawh chinah chuan Covid-19 chi thar kái an la awm lo. Sample thawn tawh, result hriatloh a la awm. Laboratory nazawngah endik theih a nih loh avangin an che chak thei lo a nih hmel,” a ti. Covid-19 State Nodal Officer, Dr. Pachuau Lalmalsawma chuan NIBMG-ah hian sample 326 thawn a ni tawh tih sawiin, result hriat tawh 69-te chu Covid-19 chi thar a ni lo tih a sawi bawk.


SVEEP Quiz zawhfel a ni

Inthlan kaihhnawih inhrilhhriatna leh felfai taka vote thlak a nih theihna tura hmalakna, Systematic Voters’ Education & Electoral Participation (SVEEP) kaltlanga Champhai District-a High School zirlaite puala District Election Office, Champhai-in a buatsaih, SVEEP Quiz Competition 2021 chu nimin khan zawhfel a ni ta a, Venglai Secondary School aiawha tel Lalhma-ngaihsangi leh Lalramtharzuala te chu pakhatna niin Rs.10,000/- leh thuziak an dawng a. Holy Mission School aiawha tel Lallawmkimi leh Vanlalhriatrengi te chu pahnihna niin,Rs.7,000/- leh thuziak an dawng a, Mary Lalhmingsangi leh Lalrinngheta, Holy Cross High School zirlaite chu pathumna niin Rs. 5,000/- leh thuziak an dawng bawk.


Hralhchhuak tan dawn

Mizoram State Medical and Technical Entrance Examination (SMATEE, 2021) application-cum-Information Brochure chu April 26, 2021 chawhma dar 11:00 atang khian Higher & Technical Education Department, Technical Wing, Chaltlang Lily Veng-ah hralhchhuah tan tur a ni a, a man hi Rs. 50 /- a ni ang.


Aizawl West-I bialtu MLA in CCC tur tlawh

Aizawl West-I bialtu MLA leh Manpower Development Board Vice Chairman, Zothantluanga chuan niminpiah tlai khan a bial chhung, Chawlhhmun Veng-a Co-operative Building, MLA Fund atanga cheng nuai 4 vel senga Covid Care Centre (CCC) atan a thuamthat chu tlawhin, an mamawh tur thil chi hrang hrang a pe a, a bial chhung Veng leh khaw hrang hrangte tlawhin hri leng mek-a an dinhmun a enkual nghal bawk.


Sample thawn belh leh a ni

AH&Vety Department Joint Director, Dr. Lalhmingthanga chuan tunhnaia Mizoram-a ASF leng mek a ziaawm leh awm loh hre turin hri lenna area pawn lamah chhan hriat loha Vawk thi, serum sample 46 leh Tissue sample 18 an lak te chu Guwahati-a North East Regional Disease Diagnostic Laboratory-ah niminpiah khan an thawn thu a sawi a, “Test result hi karlehah hriat theih a ni anga, chuta \ang chuan ASF hri leng hi a area a zau sawt em tihte a hriat theih chauh ang,” a ti. 

Inkhuahkhirhna sawiho dawn

    Mizoram-a COVID-19 hri leng hluar thar leh mek avanga chawlhkar khat chhung awh inkaihhruaina thar hman mek kalpui zel dan tur chungchang chu Vawiin hian sawrkar mi pawimawh ten an sawiho dawn nia thudawn a ni a. Nimin-a MOT Chairman, Dr. ZR. Thiamsanga hova Doctor pawl hrang hrang aiawhte thukhawm chuan hri kai thar hmuhchhuah a la tlakhniam tak tak loh avangin inkhuahkhirhna hi chawlhkar khat tal kalpui leh tha an ti a ni.

Comments

Chhiar Hlawhte