Mizoram-ah COVID-19 hri kai 30 hmuh belh leh

Niminpiah khan Mizoram-ah Sample 1890 enfiah leh niin heng atang hian COVID-19 hri kai mi 30 zet hmuhchhuah leh an ni a, State pawn atanga rawn lut bakah tualchhung-a hri inkaichhawng an awm leh nual a ni.

Niminpiah khan ZMC Laboratory-ah sample 129 enfiah niin hri kai mi pathum hmuhchhuah an ni a, tunhnaia State pawn atanga rawn lut te vek an ni. Niminpiah khan District hrang hranga TrueNat Laboratory-ah Sample 61 enfiah niin hri kai pakhat hmuhchhuah a ni a, Serchhip District atanga hri kai hmuhchhuah a ni.

Niminpiah khan Mizoram hmun hrang hrangah Rapid Antigen Test hmangin Sample 1700 enfiah niin hri kai 26 zet hmuhchhuah an ni a, Lengpui Airport Screening Point-ah Mizoram-a rawn lut tur hri kai mi 12 zet hmuhchhuah an ni. Aizawl khawpui chhung Veng hrang hrang atangin hri kai mi 10 hmuhchhuah an ni bawk a, an zinga mi 6 te chu hri kaina hriatloh an ni a, midang 4 te hi Armed Veng ami niin hri kai tawh kawmhnaih atanga hri kaichhawng an ni thung. Heng bakah hian Thenzawl khua ah Tripura atanga rawn haw chuan hri a kai tih hmuhchhuah a ni bawk a, Kolasib District-a Vairengte Screening Point-ah Mizoram-a rawn lut tur mi pathum te chuan hri an kai tih hmuhchhuah a ni.

Nimin thleng khan Mizoram-a hri kai hmuhchhuah chu 4685 tling tawhin nimin khan mi pakhat enkawl dam a ni leh a, heng te nen hian nimin tlai dar 5:00 thleng khan Mizoram-ah mi 4470 te chu enkawl dam ni tawhin hei hi hri kai hmuhchhuah atangin zaa 95.41 a ni a, tunah hian hri kai enkawllai mi 203 la awmin nunna chan mi 12 an awm tawh a ni.