Serchhip bial bye-election tluang taka neiin Vote nei zaa 83.8 ten Vote an thlak

26-Serchhip (ST) AC Bial ruak hnawhkhahna tura Bye-election neih ah Inrinni khan mipui ten tluang takin Vote an thlak zo ta a, he inthlanna atana hman Vote thlakna khawl te pawh Inrinni zan dar 11:30 vel khan Strong Room-ah dahluh fel niin he inthlanna ah hian Vote zaa 83.8 vel tlain Postal ballot te nen la pung hret tura ngaih a ni.

Election Commission of India in ruahmanna a siam anga Serchhip Bial Assembly bye-election neih ah hian Inrinni zing dar 7:00 atang khan Polling Station 29-ah Vote thlak a ni a, hmun thenkhat ah EVM-a harsatna tenau awm mah se harsatna lian thleng awm lovin Vote hi thlak chho nghal a ni a, zing lamah hian khua chhe deuh mah se Polling Station hrang hrangah Vote thlak tura intlar awm nghalin Polling Station hrang hranga inthlan buaipuitute chuan darkar 2 dan zelah Vote tlak dan report thehlutin Vote thlak hun hawn atanga darkar 2 chhungin vote zaa 18 chuang a tla hman a, chawhma dar 11:00-ah Vote zaa 35 vel tla hmanin dar 1:00-ah zaa 55.5 a tla a, chawhnu dar 3:00-ah zaa 69.5 tla hmain dar 5:00-ah zaa 77.3 a tla hman a, Election Commission of India in ruahmanna a siam anga Vote thlak hun pawhsei a tawp, zan dar 7:00-ah Vote hi zaa 83.3 a tla a, Serchhip District chhunga Vote nei mi 19,520 atangin mi 16,367 te chuan Vote hi an thlak a, hetah hian Postal Ballot hmanga Vote tla a la tel lo thung a. Postal Ballot-a vote tla zat hi chu vote chhiar ni-ah chauh hriat theih a ni ang.

Vote thlak hun zawh ve leh Polling Party te hian District Election Office-a Receiving Counter an pan nghal a, Receiving Counter a chinfel ngaite an tihfel zawhah, Electronic Voting Machine (EVM), VVPAT leh an bungraw pawimawhte hi venhimna tha tak hnuaiah Presiding Officer ten Strong Room-ah an dahlut . Strong Room hi Security thuah thum-a ven reng a ni a, CCTV tha taka vil niin Polling Party thleng hnuhnung ber hian zan dar 11:30-ah District Election Office hi an thleng a, hemi hnu hian Strong Room hi kalh felin May 2-ah Vote chhiar tura hawn leh a ni ang.

Tun tuma Serchhip Bial Assembly bye-election neih ah hian khawi atang mahin boruak duhawmlo liantham a thlen hriat a ni lova, Polling Station hrang hrangah te hian sawrkar Official te bakah Mizoram People Forum (MPF) te an duty bawk a. Hri leng laka mipuite himna turin Vote thlak tura kal apiangte hi an Thermal Scanner hmanga enfiah niin an kut silfai tur an nih bakah Vote thlakna khawl hmehna atana hman turin kutkawr sem vek an ni bawk.

Tun tumah hian COVID-19 hri kai te tan Vote thlak theih dan ruahman ni mah se hri kai enkawllai zingah Vote thlak duh an awmlo a ni.