Mizoram State Variety atan Vaimin tlangzarh a ni

Mizoram chhunga tualto Vaimim chi 2- Mizo Mimpui 1 leh Mizo Puakzo 1 te chu Mizoram State Cariety atana loneituten an chin theih turin Agriculture Minister, C.Lalrinsanga’n nimin khan a tlangzarh.

Agriculture Minister Pisa-a Mizoram State Variety atana Mizo Vaimim chi hnih tlangzarhna hunah hian Agriculture Minister, Lalrinsanga chuan heng tualto Vaimim chi 2, State Variety a puan te chu a neitu nihna humhalh tura hma lak zui a nih tur thu a sawi a. Heng Vaimim chi tha, a fang lian leh thar hlawk tak te hi ram economy chawikanna tur hmanraw pawimawh tak an ni, tiin State Variety atana puan leh chin theih tura buatsaih a lo ni ta chu Mizoram tan leh a bik takin loneitute tan hmasawnna lawmawm tak a ni, a ti bawk.

Mizoram State Variety Vaimim tlangzarhna hun hi Agriculture Department-a Special Secretary, J.Hmingthanmawia chuan kaihruaiin Agriculture Department Director, Dr. Saithantluanga chuan State Variety, Vaimim thlanchhuah a nih dan a sawi a. ICAR, Kolasib leh Agriculture Department ten Mizoram hmun hrang hrang atangin Vaimim chi hrang 70 chuang an la khawm a. ICAR Kolasib leh Mizoram KVK hrang hrang te kaltlangin heng Vaimim chi hrang zingah hian danglam bikna nei (unique trait), thar hlawk leh natna leh rannung laka him bikte thlan a nih hnuah heng thlan bikte hi State Seed Sub-Committee for Agriculture and Horticultural Crops for Mizoram kaltlangin State Variety a release tura chhawpchhuah a nih ta a ni.

Vaimim chi 2 tlangzarh tak zinga pakhat, Mizo Puakzo 1 hian kung khat ah kawm 4-5 te paiin Puakzo Variety dang aiin Anthocynin a pai hnem bik a. Mizo Mimpui 1 hi thar hlawk tak a niin a kung pawh a sang a. Ran chaw (Animal feed) atan pawh tangkai tak a ni dawn a ni.