COVID-19 thawhkhatna kan do hneh chhan kan tanrual vang a ni - Health Minister

Health Minister Dr. R. Lalthangliana chuan hlawhtling taka COVID-19 thawhkhatna kan do hneh chhan chu mi zawng zawng kan tanrual vang a ni tih sawiin, “A thawhhnihna min rawn run tan mek nia lang hi do hlawhtling leh tur chuan a hma anga kan zavaia thuawihna nena kan tanrual leh a ngai dawn a ni,” a ti

Mizoram-a damlo zai thin Doctor inzawmkhawm pawl, Association of Surgeons of Mizoram (ASM) Annual Conference vawi 2-na Inrinni-a Aijal Club MC Cabe Hall-a neih a hmanpuina ah he thu hi sawiin Health Minister Dr. R. Lalthangliana chuan COVID-19 thawh hnihna min rawn run tan mek nia lang ah Pathian malsawmna leh venhimna dawng tlak turin theihtawp kan chhuah tlan leh a ngai tih a sawi a, mitin in kan hmazawnah mawhphurhna leh tih tur kan nei vek a ni tih hriain sawrkar thu leh hla ngaichanga, zawm thin turin mipuite a chah a ni.

Health Minister chuan Surgeon ten pawl an din chu a lawmpui thu sawiin, mipuite hriselna leh enkawl dam kawngah awmze nei tak leh tangkai taka ke pen zel tura a duh thu a sawi a, harsatna hrang hrang kan tawh mek karah damlote tana inpe zo tak leh hmasawn tum tlat Doctor rual intelkhawm an awm chu a thlamuanthlak hle a ni, a ti a. Pathian in duhtaka a siam mihringte zingah hriselna kawnga harsatna neite enkawl dam hna thawktu an ni chu an chhuanawmin an mawhphurhna a sang hle tih pawh sawiin, natna chi hrang hrang bakah damdawi leh khawl te pawh khawvel thang zelah a inthlak ve zel avangin englai pawha mahni inzir chhoh reng a tul thu a sawi a. Mizoram-ah Specialist Doctor kan tlem chu a manganthlak a ni tih sawiin Minister chuan, engtianga inphuhruk tur nge tih ngaihtuah a ngai takzet tih a sawi bawk.

Association of Surgeons of Mizoram khawmpui vawi 2-na hi nileng-a neih niin hun hmasa lamah Mizoram-a Surgeon hmasa ber leh Specialist Doctor hmasa ber ni bawk, Dr. R. Tlangkunga, Feb. 4, 2021-a boral ta sunna hun hman a ni a, Doctor thiam hrang hrangte paper buatsaih chu nileng-a zirho chhunzawm a ni bawk.

Association of Surgeons of Mizoram hi kum 2018 khan din a ni a, tunah hian member 34 awm mekin an zinga 4 hian Mizoram pawnah Super Speciality/MCh an zir mek a, an pawl hian COVID-19 do nan nikum khan Chief Minister's Relief Fund ah Rs. 1,00,000/- leh Association of Surgeons of India COVID Fund ah Rs. 30,000/- an thawh bawk a ni.